Takimi në mes të tri partive të bllokut opozitar, LDK-AAK-Nisma dhe Lëvizjes Vetëvendosje, ka përfunduar pa marrëveshje. Mirëpo, nuk përjashtohet mundësia për takime tjera.

Pas takimit në mes të liderëve të tri partive të bllokut opozitar dhe Lëvizjes Vetëvendosje, kryetari i kësaj të fundit, Albin Kurti, ka deklaruar për media se nuk është arritur pajtim me opozitarët për pikat që u janë parashtruar nga subjekti i tij politik.

“Sot e patëm takimin e radhës, dhe mund të them se përafrimet e mëhershme nuk kanë pasur avancime të mëtutjeshme. Ekziston një shpërputhje midis dakordimeve verbale, deklarative të bëra më herët dhe gatishmërisë për t’i vënë këto në letër, në një tekst të shkruar dhe për t’i nënshkruar në fund”.

“Pra, mund të them se ka ngecje në përafrimet e mëhershme të cilat mund të shpijnë në një marrëveshje. Nuk ka marrëveshje me koalicioni LDK-AAK-Nisma”.

“Nuk jemi pajtuar për pikat e privatizimit dhe dialogut me Serbinë. Mund të ketë edhe një takim gjatë ditës së sotme”.

Kurti ka bërë të ditur se pa marrëveshje, VV nuk do të votojë qeverinë e opozitës dhe as kryeparlamentarin.

“Përderisa e kemi këtë situatë, Vetëvendosje nuk mund ta votojë dhe nuk do ta votojë propozimet të cilat do të dalin në Kuvend gjatë seancës konstituive të së enjtes, përkitazi me kryeparlamentarin”.

“Së pari duam një marrëveshje të plotë dhe së dyti vetëm kur realizohet kjo marrëveshje, ne do të mund të kalojmë tek votimet e deputetëve tanë në Kuvend”.

“Shpërputhjet kanë të bëjnë lidhur me çështjen e dialogut dhe çështjen e privatizimeve. Kemi pasur më herët dakordime dhe përafrime verbale, por, të cilat sot, nuk arritëm ende që t’i bëjmë marrëveshje si tekst i shkruar që do nënshkruhej prej nesh. Mbase do të ketë edhe një takim sot”.

Avni Zogiani, ndonëse kishte paralajmëruar se nuk do të merret me aktivitete të sferës publike duke përfshirë edhe politikën, siç duket ende nuk po mund të “shkëputet” nga jeta publike e politika.

Në një status në profilin e tij në Facebook, Zogiani ka shkruar “Jo negociata, VETEmeVENDOSE!”

Zogiani, në zgjedhjet e 8 qershorit ka qenë kandidat për deputet në listën e Lëvizjes Vetëvendosje.

Ai nuk ka arritur numrat e mjaftueshëm të votave për të qenë pjesë e legjislacionit të ardhshëm.

Si rezultat, ditë më parë kishte paralajmëruar se do të largohet nga sfera publike duke përfshirë këtu edhe politikën.

Lideri i AAK-së, Ramush Haradinaj, ka thënë pas takimit të liderëve, se ende ka shpresë për një marrëveshje me Vetëvendosjen.

Ai ka treguar se ka shpërputhje sa i përket mekanizmave që kanë të bëjnë me zbatimin të marrëveshjes së mundshme mes LDK-AAK-NISMA dhe Vetëvendosjes.

“E vërtetë se ka shpërputhje. Mirëpo, mekanizmat zbatues kemi shpërputhje. Por, ne ende kemi mundësi me qenë bashkë”, ka thënë Haradinaj, shkruan Express.

Ai ka thënë se do të ishte mirë të arrihej një marrëveshje para konstituimit të Kuvendit.

“Elementet e reja do të gjejmë mënyrë me i menaxhuar”, ka shtuar ai.

Lideri i AAK-së është marrë pak edhe me PDK-në dhe Hashim Thaçin. Ka thënë se është mirë që partia që ka qeverisur në dy mandatet e fundit të jetë në gjendje të menaxhojë vetën dhe të luajë rolin e opozitës konstruktive.

“PDK do të ishte mirë t’i shërbejë vendit si opozitë, të ruajnë kontrollin mbi vete”, ka thënë Haradinaj.

“Thumbimi nga rriqrat është në rënie e sipër, pasi çdo ditë e m ëpak ka raste të thumbimeve”, ka thënë sot drejtori për shëndetësi Hajdin Berisha, në mbledhjen e rregullt të Këshillit të Drejtorëve në Malishevë.

“Përveç rënies së rasteve të thumbimeve, edhe situata epidemiologjike është në kontroll. Aktualisht kemi një rast të shtrirë në klinikën infektive dhe gjendja e pacientit është e mirë dhe jashtë rrezikut për jetë”, tha Berisha.

Edhe drejtorët tjerë, kanë raportuar për aktivitet e tyre që janë dukë bërë në vazhdimësi, në realizimin projekteve të ndryshme dhe ofrimin e shërbimeve për qytetarët e Komunës së Malishevës. /PrizrenPress.com/

Gjatë muajit prill të këtij viti, Forumi Transparenca i ka bërë thirrje kryetarit të Prizrenit, Ramadan Muja që t’i rihapë takimet me drejtorët komunal për media dhe shoqërinë civile. Kërkesa për hapjen e vendimmarrjes së ekzekutivit është përsëritur edhe në debatin “Ballafaqim” mes Forumit Transparenca dhe zyrtarëve të komunës, e cila ka trajtuar çështjen e transparencës dhe llogaridhënies.

“Me gjithë këtë angazhim të medias dhe shoqërisë civile në Prizren, Ramadan Muja vazhdon të mbajë të mbyllur procesin e vendimmarrjes dhe menaxhimit të parasë publike. Duke e konsideruar transparencën si parakushtin themelor të qeverisjes demokratike dhe pasi që deri më tani nuk kemi pranuar asnjë përgjigje, ne anëtarët e Forumit Transparenca ripërsërisim kërkesën tonë për anulimin e menjëhershëm të vendimit për mbylljen e takimeve të Kryetarit me drejtorët”, tha Elmedina Baxhaku, në emër të Forumit Transparenca.

Kryetari i komunës së Prizrenit edhe në mandatin e tij të tretë të qeverisjes vazhdon praktikën e vendimmarrjes së mbyllur.

“Që nga marrja e një vendimi të këtillë vite më parë, asnjëherë nuk është dhënë një arsyetim i artikuluar dhe bindës për arsyeshmërinë e kësaj mbylljeje. Kjo praktikë, e cila bie ndesh me parimet themelore të qeverisjes transparente është dëshmia më e mirë se komuna e Prizrenit po dështon në promovimin e standardeve të qeverisjes së mirë”, thotë Baxhaku.

Ramadan Muja është i vetmi kryetari komune në Kosovë, i cili e ka mbyllur vendimmarrjen për mediat dhe shoqërinë civile. Forumi Transparenca shpreh pakënaqësinë dhe mospajtimin e vet në lidhje me pamundësinë e mediave, organizatave të shoqërisë civile dhe qytetarëve për të marrë pjesë në takimet e kryetarit të komunës me drejtorët komunalë.

“Kjo mbyllje e vendimmarrjes komunale është pengesë direkte ndaj punës së këtyre akterëve, të cilët kanë për qëllim rritjen e informimit publik. Në rast se Kryetari i Komunës nuk i përgjigjet edhe kësaj kërkese, Forumi Transparenca do të detyrohet të përdorë forma të tjera të veprimit deri në arritjen e qëllimit përfundimtar, hapjen e vendimmarrjes lokale”, thotë Baxhaku. /PrizrenPress.com/

Ka filluar të nënshkruhet peticioni për të kërkuar drejtësi ndërkombëtare për gratë e dhunuara gjatë luftës së fundit në Kosovë.

Kryetarja e bordit për peticion, Edita Tahiri, ka thënë në një konferencë për medie se qëllimi i nënshkrimit të këtij peticioni është që kryesisht e gjenocidit të nxirren para drejtësisë, shkruan Express.

Tahiri ka shtuar se peticioni po nënshkruhet në të gjithë komunat e Kosovës, por nuk ka thënë nëse i njëjti po nënshkruhet edhe në komunat veriore të Kosovës.

Ajo së bashku me organizatorët tjerë të kësaj inciative, sot do të vizitojnë edhe qytetin e Prizrenit, Suharekës, Rahovecit, Junikut, Deçanit dhe Pejës, ku do të kërkojnë nga qytetarët që të nënshkruhet ky peticion.

Peticioni që ka filluar të nënshkruhet sot do të zgjasë deri të premten derisa qytetarët mund ta nënshkruajnë atë nga ora 8:00 e mëngjesit deri në 20:00 të mbrëmjes.