Universiteti “Ukshin Hoti” në Prizren dhe Universiteti i Zarës së Kroacisë, kanë arritur marrëveshje për bashkëpunim në fushat akademike.

Marrëveshja përkatëse është nënshkruar nga rektorët e të dyja universiteteve, Prof. dr. Zahadin Shemsidini, u. d. Rektor i UPZ-së dhe Prof. dr. Ante Uglesic, Rektor i Universitetit të Zarës.

Delegacioni nga UPZ, në përbërje të u. d. Rektorit dhe Sekretaritë Përgjithshëm, z. Adem Sallauka, është pritur ngrohtësisht nga Rektori dhe Prorektori i Universitetit të Zarës të cilët kishin prejardhje arbëneshe.

Marrëveshja e Bashkëpunimit përfshinë: Shkëmbim  ndërmjet fakulteteve, studentëve dhe kërkuesve shkencor;  Bashkëpunim në kërkime shkencore, ligjërata dhe simpoziume të përbashkëta; Shkëmbim i të dhënave, dokumenteve dhe materialit kërkues në fushën e interesit të përbashkët.

Universiteti i Zarës do ta mbështes Universitetin “Ukshin Hoti” në Prizren dhe do ta përfshijë në projekte të përbashkëta të Bashkimit Evropian në fushën e arsimit universitar.

Gjatë kësaj vizite u arrit edhe marrëveshja që një student nga UPZ të shkoj në Zarë këtë vit për të studiuar në fushën e Arkeologjisë, ndërsa  të gjitha shpenzimet do t’i mbuloj Universiteti i Zarës.

Një poster që ironizon lojën me harta, një dedikim për njerëzit e korruptuar dhe një tjetër që proteston ndaj mospërfshirjes së Kosovës në FIFA. Të tria këto janë vepra arti nëpërmjet të cilave artisti Rrezeart Galica proteston.

Titullohen “Onion & Cut Always Enemies”, “For Corrupted People – No Disc” dhe “To FIFA – Don’t Play Balls with Us”. Të përmbledhura në ekspozitë të re personale me 40 punime të artit, posterët e veprat në zhanrin print të artistit nga Kosova do të ekspozohen në Turqi.

“Në mes të shqetësimit dhe qetësisë” është titulli i ekspozitës që Galica do të hapë në Turqi me ftesë të Universitetit Anadölu, universitet ky që në rang listën botërore të cilësisë zë vend të lakmueshëm. Pjesë e shqetësimit të tij artistik janë edhe sfidat me të cilat po përballet shoqëria turke. Galica do të ekspozojë edhe një vepër artistike që i dedikohet vendimit të kryeministrit turk, Recep Tayyip Erdogan, për ndalimin e rrjetit të njohur social “Twitter”. Të gjitha veprat e Galicës, të realizuara si fotografi, print dhe posterë, do të ekspozohen në galerinë e arteve të Universitetit Anadölu, më 26 maj të këtij muaji.
Ekspozita multimediale, sipas Galicës, përfshin punime të reja të tij të paekspozuara më parë. “Përveç njërës nga punimet që pasqyron flamujt e shteteve që e kanë njohur Kosovën, e cila vepër pasurohet vazhdimisht”, ka thënë Galica.
“Në mes të shqetësimit dhe qetësisë” për shkak se vetë ekspozita përbëhet nga dy cikle e zhanre, në njërën anë me posterë e print trajtoj tema më të nxehta e shumë provokuese derisa te fotografitë jam fokusuar në anë tonë tradicionale dhe përveç në Kosovë janë të realizuara edhe në Shqipëri, Mal të Zi e Turqi” ka shpjeguar ai. Galica ka dhënë shumë detaje për temat që i ka trajtuar në zhanret e posterit dhe print.

“Trajtojë kryesisht dukuri të ndryshme negative dhe provokuese. Për shembull, një ndër ta bën fjalë për ndalimin e “Twitter”-it në Turqi”, ka thënë ai.

“Në mes të shqetësimit dhe qetësisë” do të jetë në dispozicion të artdashësve turq të artit për një muaj.
Rrezeart Galica u lind më 25. 9. 1981, në Prishtinë. Gjatë viteve 2000-2005 studioi në Fakultetin e Arteve të Universitetit të Prishtinës, Drejtimi i Dizajnit Grafik, ndërsa në vitet 2006-2008 kreu shkallën e tretë, ku magjistroi në këtë Fakultet, në Drejtimin e Dizajnit Grafik, Departamenti i Multi¬medias.
Punimet e tij të ekspozitës së parë personale, të titulluar “Para fillimit” janë bërë referencë e studentëve të artit në Akademinë e Arteve të Bukura të Peruxhas dhe Akademisë Katolike të Arteve në Milano në Itali. Aktualisht ndjek studimet në shkollën doktorale të QSA-se në drejtimin e historisë së artit në Tiranë, Shqipëri. / KultPlus.com

Premiera e shfaqjes “Ekspozita” e regjisorit Astrit Kabashi, bazuar në tekst të dramaturgut të njohur çek, Vaclav Havel, është dhënë të martën mbrëma në teatrin “Dodona” në Prishtinë. Teksti që është pjesë e trilogjisë së njohur të veprave “Audienca”, “Protesta” dhe “Ekspozita”, është inskenuar për herë të parë në skenën kosovare dhe është përkthyer nga Melihate Qena.

Haveli e ka shkruar “Ekspozitën” në vitin 1975, ndërsa aktori e regjisori i ndjerë Faruk Begolli e kishte pasur në plan ta realizonte para shtatë vjetësh, shkruan “Koha Ditore”.

“Ekspozita” është një rrëfim që shpërfaq farsën e lumturisë që buron nga bota materiale, tek përplas dallimet sociale. Tërthorazi prek edhe sistemet totalitare, duke i paraqitur ato si kalimtare njësoj sikurse bota e çiftit Michael e Vera.

“Vernisáž”, e realizuar më në fund në Kosovë nga Kabashi, është duartrokitur nga audienca. Shfaqja është lavdëruar edhe nga kritika.

“Mendoj se është mirë që teksti ‘Ekspozita’ me autor Vaslav Havel është përkthyer dhe sjellë në skenën e një teatri, për herë të parë në Kosovë”, ka thënë dramaturgu Arian Krasniqi, tek ka komentuar edhe punën e Kabashit dhe aktualitetin e tekstit. “Teksti është jashtëzakonisht interesant, dhe edhe sot është aktual në raport me dallimet sociale që ekzistojnë në vendin tonë, si dhe ‘falsitetit’ të njerëzve. Vlerësoj punën e Astrit Kabashit për herë të parë në cilësinë e regjisorit”, ka shtuar ai,transmeton Koha. net.

Aktori e regjisori Enver Petrovci ka thënë se puna e Kabashit duhet marrë si shembull që edhe aktorët e tjerë të realizojnë shfaqje meqë, sipas tij, ata janë shpëtimi i teatrit.

“Kur aktorët luajnë mirë, edhe regjia është e mirë. Nëse aktorët luajnë mirë është meritë e regjisorit, edhe nëse aktorët nuk luajnë mirë, është prapë faji i regjisorit. E këtu aktorët luajtën shumë mirë. Regjisori ua ka mundësuar të luajnë mirë”, ka thënë Petrovci.
Vetë Kabashi ka thënë se studentët e tij, Podrimaj dhe Kasumoviq, sikurse edhe aktori tjetër, Gashi, i kanë kaluar pritjet e tij.
“Kanë qenë të mrekullueshëm. Ka qenë një punë shumë e madhe. Ka dy muaj që punojmë me këtë tekst dhe mendoj se është një tekst që përkon me kohën e sotme”, ka thënë Kabashi.

Për aktoren My-Linda Kasumoviq, Vera ka qenë një personazh më sfidues sesa rolet që ka pasur më herët.

“Sepse shumicën e roleve që i kam pasur deri tani kanë qenë më shumë detyra shkollore dhe të shkurtra, 10 apo 15 minutash. Kështu që definitivisht mund të them që ky ka qenë shumë më sfidues”, ka thënë Kasumoviq, tek ka shtuar se për të ka qenë privilegj të punojë me profesorin e saj, Astrit Kabashi.

Një ribashkim i bendit “Destiny’s Child”, ku paraqitet edhe Solange, është përfshirë në këngën e re të Michelle Williams, “Say Yes”.

Beyonce dhe Kelly Rowland kanë incizuar skena për videon e re të Williams këtë javë.

Kënga e Williams është përshkruar si një këngë shumë inspiruese.

Incizimet e klipit janë kryer në Maplewood, New Jersey më 20 maj.

Një grup i madh i fansave u mblodhën në vendin ku po xhirohej klipi, duke shkrepur fotografi e video për t’i shpërndarë ato më pas në rrjetet sociale.

Ribashkimi i fundit i “Destiny’s Child” ka qenë ai i vitit 2013 për një përformancë të shkëlqyer në Super Bowl XLVII.