Presidentja e Kosovës, Atifete Jahjaga, ka vlerësuar se Marrëveshja e 19 prillit në Bruksel, ndërmjet Kosovës e Serbisë, paraqet të arriturën më të madhe në dialogun në mes të dy vendeve dhe fuqishëm e hapë rrugën për zgjidhjen e problemeve ndërmjet dy shteteve dhe për integrimin në Evropë.

“Marrëveshja ka kuptim vetëm kur të zbatohet në tërësi, secila pikë dhe secia pjesë e saj”, tha Jahjaga në intervistën për agjencinë beogradase Beta, dhe ka shtuar se Kosova “dëshiron që realizimin e marrëveshjes ta mbikëqyrin Bashkimi Evropian dhe Shtetet e Bashkuara si ndërmjetësues, pasi konsiderojmë se kjo do tu ndihmoj të dy palëve, që të jenë përgjegjëse për realizimin e asaj për të cilën janë marrë vesh”.

Presidentja e Kosovës, Atifiete Jahjaga, ka theksuar se “Kosova është realitet në Evropë dhe ky realitet është pranuar nga më tepër se 100 shtete, bile edhe nga një pjesë e mekanizmave ndërkombëtarë financiarë të rëndësishëm dhe gjithsesi e ka të hapur rrugën kah BE-ja, sikur edhe të gjitha vendet e tjera të Evropës Juglindore”.

Kandidati i PDK-së për kryetar të Prizrenit Ramadan Muja, votën për balotazhin e 1 dhjetorit e ka kërkuar para banorëve të fshatit Mushnikovë dhe Lubizdhë. Ai iu ka premtur se do të vazhdojë të punojë edhe në mandatin e tretë për të përmisuar jetën e tyre.

”Ju falenderoj shumë dhe përzemërsisht që me 3 nëntor me votuat për kryetar të Prizrenit. Ju ftoj që edhe me 1 dhejetor të votoni dhe të festojmë së bashku”, tha Muja.

“Ne do të angazhohemi fuqishëm që në Ekzekutivin Komunal të Prizrenit të përfaqësojmë interesin publik të qytetarëve dhe së bashku do të hartojmë prioritetet e projekteve të cilat do të ngrisin cilësinë e jetesës së qytetarëve edhe në paralagjen e qytetit Lubizhdë dhe Mushnikovë”.

Nënkryetari i PDK-së Enver Hoxha, tha ndërkaq se fitorja e PDK-së në zgjedhjet e 3 nëntorit ka qenë historike. “Votat e Lubizhdës i kanë dhënë verdiktin përfundimtar fitores sonë të përbashkët”, tha Hoxhaj.

Në këto tubim elektorale ftesë për dalje në zgjedhje më 1 dhjetor kanë bërë edhe anëtarët tjerë të koalicionit, Fatmir Kastrati nga AAK, Emilija Rexhepi nga NDS, Rasim Demiri nga VAKAT. Ata thanë se kandidati Ramadan Muja përfaqëson me dinjitet të lartë edhe votën e tyre. /PrizrenPress.com/

Në kuadër të projektit të monitorimit të transparencës së ekzekutivit komunal të Mamushës, “EC Ma Ndryshe” gjatë muajit nëntor ka shqyrtuar çështjen e shpenzimeve të qeverisë komunale në lidhje me organizimin e Festivalit të Domates.

Në saje të dhënave zyrtare del se Komuna e Mamushës për organizimin e Festivalit të Domates në vitin 2013 ka shpenzuar afër 15 mijë euro. Shuma e njëjtë e mjeteve është harxhuar edhe për edicionin e vitit 2012.

“Bazuar në faturat e shpenzimeve për vitin 2013, 5.210 euro janë paguar për transportin me aeroplan nga Stambolli në Prishtinë, pastaj transportin me autobusë në relacionet Prishtinë-Mamushë dhe Mamushë-Prizren, si dhe rregullimin e binës, ndriçimit dhe zërimit. Ndërsa 3.294 euro ka kushtuar akomodimi i mysafirëve, derisa ushqimi dhe materialet promovuese kanë kushtuar 6.485 euro”, theksoi Elmedina Baxhaku, monitoruese OJQ “EC Ma Ndryshe”.

“EC Ma Ndryshe” është në dijeni se Festivali i Domates është njëra nga ngjarjet kryesore në këtë komunë, ku bujqësia është njëra nga veprimtaritë më të rëndësishme ekonomike. Prandaj, përshëndet dhe inkurajon autoritetet komunale që të ndërmarrin aktivitete që promovojnë produktet bujqësore të kësaj ane, por edhe vet imazhin e komunës së re.

“Mirëpo, duke marrë parasysh shumën e mjeteve të harxhuara, pra 15 mijë euro, që përputhet me shifrën që Komuna e Prizrenit i ndan për “Dokufestin”, si një ngjarje kulturore e nivelit ndërkombëtar, atëherë “EC Ma Ndryshe” konsideron se Komuna e Mamushës duhet të bëj përpjekje më të mëdha që për këtë shumë të parave të siguroj vlerë më të shtuar për publikun”, theksoi Bazhaku.

Ky konstatim bazohet edhe në faktin se të hyrat komunale të Mamushës në vitin e kaluar kanë qenë të kufizuara, pra rreth 43 mijë euro, që nënkupton se shpenzimet për organizimin e këtij festivali kalojnë një të tretën e të hyrave vetanake.

Bazuar në këto të gjetura, “EC Ma Ndryshe” rekomandon komunën e Mamushës që të:
-Sigurohet se paratë e harxhuara do të sjellin vlerë të shtuar për Komunën dhe banorët e Mamushës, duke promovuar lokalitetin dhe produktet bujqësore me aktivitete cilësore dhe gjithëpërfshirëse që do të ndikonin edhe në lidhjen e marrëveshjeve respektivisht rritjen e shitjes së domateve dhe produkteve tjera bujqësore;
-Bashkëpunoj me Shoqërinë Civile dhe Ministrinë e Bujqësisë rreth organizimit të Festivalit; dhe
-Publikoj thirrje për propozime për konceptin dhe organizimin e Festivalit, për çdo edicion. /PrizrenPress.com/

Ambasadorja e SHBA-ve, Tracey Jacobson, gjatë takimit me përfaqësuesit e Rrjetit Evropian të Organizatave për Vëzhgimin e Zgjedhjeve (ENEMO) për të diskutuar përpjekjet ndërkombëtare për vëzhgimin e zgjedhjeve të 1 dhjetorit në Kosovë, ka bërë me dije se janë duke shikuar nga afër dhe presin që përmirësimet e arritura në rrethin e parë të zgjedhjeve të ruhen. “Nëse më 1 dhjetor procesi do të ketë defekte apo mashtrime, përparimi i bërë në rrethin e parë të zgjedhjeve të nëntorit do të bëhet i pakuptimtë”, ka thënë Jacobson.

“Më vjen mirë që ambasada e SHBA-ve po u bashkohet organizatave tjera ndërkombëtare si ENEMO-ja në vendosjen e vëzhguesve në vendvotime nëpër tërë Kosovën më 1 dhjetor”, ka thënë Jacobson.

Ambasadorja u ka bërë thirrje gjithë qytetarëve të Kosovës që të vazhdojnë të raportojnë tek autoritetet e Kosovës çfarëdo problemi që ata shohin.

“Në zgjedhjet e nëntorit qytetarët bënë më shumë ankesa se kurdoherë më parë dhe ne presim nga policia e Kosovës dhe prokurorët të vazhdojnë përkushtimin e tyre për hetimin dhe ndjekjen e mashtrimeve të paraqitura. Qytetarët e Kosovës janë ata që janë më së miri të pozicionuar për të raportuar çfarëdo problemi apo parregullsie që ata e vërejnë – dhe ne inkurajojmë të gjithë qytetarët: nëse shihni diçka, thoni diçka”, ka porositur ambasadorja Jacobson.

Ish kryetari i Kuvendit në Bashkësinë Islame, Xhabir Hamiti, si dhe imami i shkarkuar nga Kaçaniku, Musli Vërbani, kanë zbuluar disa detaje rreth organizimit të BIK-ut. Ata në emisionin PULS të KTV-së të udhëhequr nga Mefail Bajqinovci, kanë thënë se deklaratat e institucionit të BIK-ut lidhur me shkuarjen e të rinjve nga Kosova në Siri janë të vonuara.

Gjithashtu gjatë këtij emisioni është debatuar edhe për riemërimin e myftiut Naim Tërnava.

“Askush nga institucionet nuk e uroi, as shoqëria civile e as besimtarët rizgjedhjen e Naim Terrnavës në postin e kryetarit të BIK-ut” tha Hamiti, duke shtuar se BIK-u ka bërë me çdo kusht të mbajnë në monopol sistemin zgjedhor dhe financat.

Çfarë zgjedhje janë transparente kur kryesia e BIK-ut shpall zgjedhjet, kryesia formon komisionin zgjedhor, kryesia e mbikëqyr zgjedhjet, kryesia e BIK-ut cakton kush duhet më qenë kandidat, pra këtë duhet bërë Kuvendi e jo kryesia, shtoi Hamiti, raporton Koha.

Ai gjithashtu hodhi akuza në drejtim të BIK-ut ku tha se përpos që i është bërë padrejtësi në shkarkimin si kryetar i kuvendit, ai theksoi se tani është hequr edhe nga strukturat e Fakultetit të Studimeve Islame.

Kurse Musli Verbani, doktor i shkencave juridike të Islamit është shprehur se, në BIK është bërë puq institucional nga udhëheqja e tanishme.

“Bashkësia Islame e Kosovës mund të them se është mafi, e largon kënd të dojë, si të dojë nga puna.

Unë kam qenë pjesë e BIK-ut por unë jam suspenduar për shkak se unë nuk kam bë çka ata kanë dashur. Sistemin mafioz e ka përdor BIK-për ti eliminuar njerëzit si unë dhe tjerët”, tha Vërbani.