Pavarësisht vullnetit të ShBA-së dhe BE-së, që zgjedhjet e reja parlamentare mos të mbahen pa përfunduar reforma zgjedhore, subjektet kryesore politike në vend janë shprehur të gatshme për zgjedhje edhe pa reformë zgjedhore.

Tri subjektet politike, Partia Demokratike e Kosovës (PDK), Lidhja Demokratike e Kosovës (LDK) dhe Lëvizja Vetëvendosje! nuk e kanë përjashtuar mundësinë që në zgjedhjet e parakohshme parlamentare të shkohet edhe pa përfunduar reforma zgjedhore e nisur para dy vjetëve pavarësisht vullnetit të ShBA-së dhe BE-së që një gjë e tillë të mos ndodhë.

Përfaqësuesit e PDK-së dhe të LDK-së kanë deklaruar për “Epokën e re” se nëse është e nevojshme për zgjedhje të reja parlamentare, reforma e papërfunduar zgjedhore nuk do të paraqiste pengesë për ta, ndërsa përfaqësuesit e VV-së kanë vlerësuar se reforma zgjedhore nuk mund të bëhet nga njerëz që kanë dalë nga votat e vjedhura. Megjithatë, ata kanë pranuar se më mirë do të ishte që në zgjedhje të shkohet pas përfundimit të reformës zgjedhore.

Nënkryetari i PDK-së, Hajredin Kuçi, ka thënë për “Epokën e re” se kurdo që preket legjitimiteti demokratik partia e tij është e gatshme. “Kurdo që të preket legjitimiteti demokratik jemi të gatshëm të shkojmë në zgjedhje”, ka deklaruar Kuçi. Ai ka pranuar se më mirë do të ishte që zgjedhjet të mbahen pas një reforme të mirëfilltë zgjedhore. “Jemi të fokusuar të kemi zgjedhje demokratike dhe ta përfundojmë këtë proces me faqe të bardhë. Pastaj do të koncentrohemi në temat e tjera, përshirë edhe reformën zgjedhore. PDK-ja është e gatshme për zgjedhje nacionale, kurdo që arrihet një marrëveshje politike për një çështje të tillë”, ka deklaruar ai.

Të njëjtën gatishmëri për zgjedhje të parakohshme pa reformë zgjedhore e ka shprehur edhe nënkryetarja e LDK-së, Teuta Sahatqija. Ajo ka premtuar se nëse shkohet në këtë variant LDK-ja si fituese e këtyre zgjedhe do ta përfundonte reformën. “Në rast nevoje në zgjedhje mund të shkohet edhe pa reformë. Në atë rast, pas këtyre zgjedhjeve, LDK-ja si fituese do ta përfundojë reformën”, është shprehur Sahatqija. Ajo ka parapëlqyer që në zgjedhjet e parakohshme të shkohet me një reformë të përfunduar zgjedhore. E për zvarritjen e reformës zgjedhore ajo e ka fajësuar kryeministrin Hashim Thaçi.

Ndërsa Albulena Haxhiu nga VV-ja ka deklaruar për “Epokën e re” se kjo lëvizje qysh në shtator të vitit 2011 ka kërkuar zgjedhje të jashtëzakonshme. Ajo ka treguar se para dy vjetëve e shtatë muajve që është formuar komisioni për ndryshimin e ligjit për zgjedhjet e përgjithshme asnjëherë deri më tani nuk ka pasur reformë të mirëfilltë zgjedhore. “Tashmë ndodhemi jo larg zgjedhjeve parlamentare dhe ne nuk do të jemi në gjendje t’i krijojmë mekanizmat për mbrojtjen e votës së qytetarëve, pasi kjo reformë nisi mbrapsht dhe kështu do të përfundojë. Jemi të bindur që reformë zgjedhore nuk do të ketë asnjëherë me njerëz që kanë dalë nga votat e vjedhur”, ka deklaruar Haxhiu.

Ajo ka deklaruar se subjekti i saj politik me apo pa reformë zgjedhore do të angazhohet sikur edhe në zgjedhjet lokale për ta mbrojtur me çdo kusht votën e qytetarit. “Ligji për zgjedhjet e përgjithshme nuk i kishte fajet që ne kishim vjedhje industriale të votave, por shkelësit e ligjit që u organizuan për vjedhje në manipulimin më të madh zgjedhor të Kosovës së pasluftës. Përgjatë gjithë kësaj kohe vazhdimisht kemi insistuar për qasje serioze karshi reformës zgjedhore por, fatkeqësisht, nuk ka pasur vullnet politik nga subjektet nënshkruese të marrëveshjes së prillit 2011”, është shprehur Haxhiu.

Ndërkohë që, Shtetet e Bashkuara të Amerikës (SHBA) dhe Bashkimi Evropian (BE) disa herë kanë bërë thirrje se nuk do të ishte mirë të shkohet në zgjedhje të reja nacionale pa reformimin e ligjit për zgjedhje. Këtë qëndrim ambasadorja e ShBA-ve në Kosovë, Tracey Ann Jacobson, e ka përsëritur edhe të martën. Në një intervistë për “RTV21”, diplomatja amerikane ka thënë se zgjedhjet e përgjithshme duhet të organizohen gjashtë muaj pasi të ketë përfunduar reforma zgjedhore. “Do të ishte gabim i madh për Kosovën të mbajë zgjedhje të përgjithshme pa reformë zgjedhore. BE-ja ka thënë se nuk do të dërgojë vëzhgues nëse këto zgjedhje do të mbahen pa reformë zgjedhore në kohën e caktuar gjashtë muaj para zgjedhjeve. Kemi dëgjuar të thuhet se zgjedhjet do të mbahen në qershor. Nëse është kështu, atëherë reforma duhet të përfundojë më së largu deri në fund të dhjetorit”, ka thënë Jacobson. Edhe lideri i AAK-së, Ramush Haradinaj, dhe ai i AKR-së, Behgjet Pacolli, kanë përsëritur disa herë se nuk është mirë që Kosova të hyjë në zgjedhje të parakohshme pa u kryer reforma zgjedhore.

Raportohet se në fshatin Brezne të Dragashit, një qytetarë është goditur nga traktori i cili ishte në oborr dhe për një moment është lëshuar në lëvizje dhe si pasojë i njëjti nga lëndimet e marra ka ndërruar jetë,transmeton Indeksonline.

Sipas Policisë së Kosovës, trupi i pajetë në konsultim me prokurorin u është liruar familjarëve.

Aleanca për Ardhmërin e Kosovës (AAK) në Prizren, ka konfirmuar edhe një herë se në baltoazhin e 1 dhjetorit do të përkrahë kandidatin e PDK-së,për kryetar të Komunës, Ramadan Mujën.

Zëdhënësi i AAK-së, Sejdi Ballanica tha se Kryesia në mbledhjen e fundit unanimisht ka marrë vendim që të përkrahë Mujën.

“Kryesia e AAK-së, Dega në Prizren në mbledhjen e saj të radhës, edhe një herë, në mënyrë unanime e përkrah koalicionin me PDK-në dhe do ta përkrah kandidatin për kryetar të Komunës së Prizrenit nga radhët e PDK-së Ramadan Muja në balotazhin që do të mbahet më 1 dhjetor të këtij viti”, tha Ballanica.

Sipas tij, AAK-ja nga sot do të fillojë takimet me kryetarët e nëndegëve dhe strukturat tjera të partisë në mënyrë që të organizohen sa më mirë që më 1 dhjetor të dalin sa më masovikisht në zgjedhje dhe të votojnë Ramadan Mujën për kryetar të Komunës së Prizrenit. “Koalicioni AAK-LDD do të jetë përkrah partnerëve të Koalicionit në fitoren e 1 dhjetorit”./PrizrenPress.com/

Komisioni Qëndror i Zgjedhjeve ka bërë të ditur se nga e hëna e tutje, do të nis fushata pesëditëshe për rrethin e dytë të zgjedhjeve lokale që mbahen më 1 dhjetor.

Komisioni Qendror i Zgjedhjeve ka vërtetuar rezultatet e rrethit të parë të këtyre zgjedhjeve, ndërsa ka urdhëruar përsëritje të zgjedhjeve në tri vendvotime në komunën e Zveçanit, komunë kjo me shumicë serbe në veri të Kosovës.

Kjo është hera e parë që komunat veriore marrin pjesë në zgjedhjet komunale të Kosovës, hap që pason marrëveshjen e arritur në prill mes Thaçit e Daçiqit, në kuadër të dialogut për normalizimin e mardhënieve, të lehtësuar nga Bashkimi Evropian.

Komisioni Qendror i Zgjedhjeve (KQZ) ka vendosur të mërkurën që nga 25 deri më 29 nëntor të jetë fushata parazgjedhore për kryetar të komunave të cilat do të shkojnë në balotazh.

Sipas vendimit që ka marrë institucioni për organizimin e zgjedhjeve heshtja parazgjedhore do të jetë me 30 nëntor, ndërkaq, zgjedhjet do të mbahen me 1 dhjetor.

Nga 38 komuna sa janë gjithsej në Kosovë, në shumicën prej tyre do të ketë rund të dytë të zgjedhjeve lokale, ngase, asnjëri prej kandidatëve potencial për kryetar komunash nuk ka arritur të fitojë shumicën, gjegjësisht, të fitojë në rundin e parë.

“Komisioni Qendror i Zgjedhjeve shpalli zyrtarisht datën 01 dhjetor 2013 si datën kur do të mbahet Raundi i Dytë i zgjedhjeve për kryetarë të komunave, si dhe kohëzgjatjen e fushatës për këtë raund. Periudha e fushatës për Raundin e Dytë të Zgjedhjeve për kryetar komune fillon më 25 nëntor dhe përfundon më 29 nëntor 2013”, thuhet në njoftimin e Komisionit Qendror Zgjedhor.

Zgjedhjet lokale në Kosovë këtë vit janë mbajtur me 3 nëntor, ndërsa për dallim nga ato të kaluarat, sivjet nuk ka pasur ankesa dhe parregullsi të shumta.

Komunat në balotazh

Komunat kryesore që kanë shkuar në balotazh në raundin e dytë: Prishtina, Prizreni, Gjilani, Mitrovica, Gjakova, Peja, Ferizaj, Rahoveci, Vushtrria, Juniku, Lipjani, Vitia, Klina, Malisheva, Obiliqi, Dragashi, Kamenica, Shtërpca, Suhareka, Graçanica, Parteshi, Ranillugu, Kllokoti, Novobërda dhe Mitrovica e Veriut.

Kryetari i Aleancës për Ardhmërinë e Kosovës, Ramush Haradinaj, është nderuar me titullin Qytetar Nderi i Bashkisë së Pukës në Republikën e Shqipërisë.

Në një ceremoni të organizuar enkas në 69-vjetorin e Ditës së Çlirimit të Pukës, çmimin Qytetar Nderi i Bashkisë së Pukës Haradinajt ia ka dorëzuar kryetari i Bashkisë së Pukës, Beqir Arifaj.

Kryebashkiaku i Pukës ka thënë se është nder i veçantë i Pukës dhe pukjanëve që nga sot, bashkëqytetar nderi të tyrin, pikërisht në Ditën e Çlirimit të Pukës, ta kenë kryetarin e AAK-së, heroin dhe ish-kryeministrin e Kosovës, njeriun që dha gjithçka për lirinë dhe pavarësinë e Kosovës dhe për çështjen shqiptare në përgjithësi, Ramush Haradinajn.

Haradinaj, me rastin e pranimit të çmimit Qytetar Nderi i Bashkisë së Pukës, ka thënë se ky akt është një obligim shtesë, por edhe nder për të personalisht dhe për secilin bashkëluftëtar të tij nga Ushtria Çlirimtare e Kosovës, për familjen, bashkëpunëtorët, aleancën dhe mbarë vendin. “Lufta për lirinë e Kosovës nuk u bë veç në Kosovë. Ajo u mbështet fuqishëm nga të gjithë ju, e për këtë jemi falënderues dhe mirënjohës njëkohësisht. Ajo që e arritëm të gjithë bashkë me lirinë e Kosovës është arritje për shqiptarët në përgjithësi, por edhe kontribut i yni dhe obligim për lirinë në botën mbarë. Me nderin që po më bëni sot, nderohem unë, nderohen bashkëluftëtarët e mi në UÇK, nderohet Kosova dhe nderohemi të gjithë ne”, ka thënë Haradinaj. (RTK)