Kryeministri i Kosovës, Hashim Thaçi dhe ai Serbisë, Ivica Daçiç, do të takohen sot në Bruksel me ndërmjetësimin e shefes së politikës së jashtme të Bashkimit Evropian, Catherine Ashton.

Takimi i konfirmua nga zonja Ashton e cila tha se do të diskutohen hapat e ardhshëm në procesin zgjedhor në Kosovë si dhe ne zbatimin e marrëveshjes së muajit prill për normalizimin e marrëdhënieve ndërmjet të dyja vendeve.

Ajo i vlerësoi zgjedhjet e së dielës në Kosovë për pushtetin komunal si thelbësore për të ardhmen e Kosovës, ndërsa dënoi ashpër incidentet e dhunshme në veriun e Mitrovicës.

“Të gjithë votuesit kanë të drejtë pjesëmarrjeje në zgjedhje në një mjedis të sigurt dhe pa dhunë. Incidentet duhet të hetohen pa vonesë” thuhet në një deklaratë të zonëjs Ashton.

Kjo çështje pritet të jetë edhe një nga temat kryesore të bisedimeve të nesërme. Votimet në veriun e Mitrovicësu dëmtuan nga incidentet e së dielës mbrëma, kur persona të maskuar ndërhynë dhe shkatërruan kutitë e votimit në disa vendvotime në veri të Mitrovicës, duke detyruar largimin e komisionit të zgjedhjeve dhe të përfaqësuesve të Misionit të OSBE-së.

Vëzhguesit ndërkombëtarë të Bashkimit Evropian(BE) të angazhuar për zgjedhjet lokale të mbajtura më 3 nëntor janë udhëzuar që në takime me bashkëbisedues të ndryshëm në asnjë mënyrë mos t’i referohen Kosovës si shtet ose republikë.
Për të mos u përsëritur parregullsitë në zgjedhjet lokale, si në zgjedhjet paraprake të organizuara në vend, BE ka dërguar në Kosovë mbi 100 vëzhgues.

Sipas një dokumenti të siguruar nga gazeta “Zëri” të përpiluar nga institucionet e Bashkimit Evropian, iu rekomandohet vëzhguesve të tyre që për shkak të ndjeshmërisë politike duhet t’iu përmbahen disa praktikave në bashkëbisedimet e ndryshme.

“Kur flitet për shtetin mundohuni të shmangni në takime me bashkëbiseduesit referimet për Kosovën si “shtet” ose “republikë”. Referojuni si territori i Kosovës”, thuhet mes tjerash në këtë dokument.

Ndërsa kur flitet për qytetarët, vëzhguesve u rekomandohet t’iu shmangen referimeve si qytetarë të Kosovës, por si popull i Kosovës.

Në këtë dokument po ashtu flitet edhe për emrat e vendbanimeve në Kosovë, ku u rekomandohet që të përdoren në dy gjuhë: shqip dhe serbisht.

“Kur iu referoheni emrave të vendeve, ju lutem ta keni parasysh se shumica e vendeve në Kosovë kanë emra shqip dhe serbisht.

Në raportimin tonë të jashtëm, praktika është që të vendoset emri shqiptar, i përcjellë nga emri serb si: Pejë- Peç, përveç në komunat me shumicë serbe, ku duhet të vendoset së pari emri serb, i përcjellë nga emri shqiptar si: Gracanica- Graçanicë”. /Zëri/

Ai i cili po konsiderohet si një nga humbësit më të mëdhenj në këto zgjedhje, kryetari aktual i Malishevës, Isni Kilaj, nga PDK-ja, beson që votuesit e tij do ta votojnë kandidatin e Iniciativës Qytetare të Malishevës në raundin e dytë të zgjedhjeve lokale.

Pavarësisht asaj që gjatë fushatës dhe ditën e zgjedhjeve janë regjistruar tensione të mëdha në mes të PDK-së së kryeministrit Thaçi dhe Iniciativës që përkrahet nga dy të rebeluarit e PDK-së, Jakup Krasniqi dhe Fatmir Limaj, elektorati i të dy subjekteve është i njëjtë.

“Iniciativa ka qenë elektorat i yni, dhe elektorati i PDK-së është i njëjti me IQM-në, por megjithëkëtë ende nuk jemi përcaktuar zyrtarisht”, ka thënë Kilaj.

Mirëpo Kilaj, para se të flasë për ndonjë bashkëpunim me dikë tjetër ai ende shpreson në magjinë e ndryshimit të rezultatit, pasi që thotë se diferenca me LDK-në në Malishevë është tejet e ngushtë.

“Ende nuk janë certifikuar rezultatet dhe diferenca është shumë e ngushtë, ne do ta presim rezultatin zyrtar”, ka thënë Kilaj për “Zërin”.

Gara për votat e humbësve

Ndonëse lufta për rrëmbim elektorati të partive me përqindje më të vogël të votave nga ato që kanë shkuar në balotazh tashmë ka filluar, kandidatët nuk e pranojnë një gjë të tillë. Thonë se po respektojnë procedurat dhe pa u certifikuar rezultati i raundit të parë, zyrtarisht nuk kanë filluar diskutimet me asnjë parti.

Kandidati i Iniciativës Qytetarë për Malishevë, Ragip Begaj, i cili fitoi 42,19 për qind të votave në këtë komunë, ka thënë se ende janë të papërcaktuar për koalicion, kjo, sipas tij, mbetet të shihet ditët në vazhdim. Megjithatë, ai thotë se ka besim në votën e qytetarëve të Malishevës që mund të fitojë edhe pa koalicion. Shpresat i ka në ata që nuk janë të përcaktuar për ndonjë parti.

“Unë kam besim në qytetarët e Malishevës dhe ata që nuk janë të përcaktuar për asnjë parti do ta bëjnë fitoren tonë. Ne për këtë përqindje që fituam kemi kërkuar votën të gjithë qytetarëve dhe nuk e dimë se kush na mbështet më shumë ose më pak”, ka thënë Begaj.

Edhe Salih Morina, kandidat i LDK-së në këtë komunë, i cili sipas të gjitha gjasave do të shkojë në balotazh me 25,81 për qind të votave, ka thënë se nuk kanë vendosur ende se çfarë do të bëjnë. Për një gjë të tillë Morina ka thënë se duhet të diskutohet edhe me strukturat e degës së partisë.

“Ne do të dalim prapë në terren, do të angazhohemi, do të bisedojmë me qytetarët dhe të kërkojmë prapë votë për mbështetje. Nuk kam asnjë kërkesë deri më tani nga asnjë subjekt politik. Ndërsa ne a do t’i bëjmë ndonjë partie ftesë, ajo mbetet të diskutohet me strukturat e degës së LDK-së. Ne presim nga votuesit e të gjitha partive që s’janë në garë për raundin e dytë”, ka thënë ai.

Përfaqësuesi Special i BE-së dhe shefi i Zyrës së BE-së në Kosovë, shefat e misioneve të shteteve anëtare të BE-së të pranishëm në Kosovë, si dhe shefi të EULEX-it i kanë dënuar ashpër sulmet në tri qendrat e votimit në Mitrovicën e veriut.

“Zgjedhjet lokale që për herë të parë janë mbajtur në të gjitha komunat e Kosovës, në përputhshmëri me ligjin e Kosovës, janë shënuar me një fushatë intensive, proces transparent dhe kanë dëshmuar qartë vendosmërinë e qytetarëve për të përzgjedhur liderët e tyre lokalë.

Pjesëmarrja e përgjithshme nëpër pjesën më të madhe të Kosovës, përfshirë këtu daljen e madhe të votuesve serbë, ka treguar se qytetarët janë të etur për të vendosur dhe për të përmirësuar procesin e zgjedhjeve aty ku ende është e nevojshme.

Fakti se Misioni i parë i BE-së për Vëzhgimin e Zgjedhjeve ka vlerësuar se dita e zgjedhjeve ka kaluar “e qete dhe paqësore” duke e cilësuar tërë procesin zgjedhor si ”një hap pozitiv të demokracisë në Kosovë” paraqet një element të rëndësishëm në fuqizimin e progresit të Kosovës drejt rrugës evropiane.

Me kënaqësi e kemi vërejtur se me përgatitje të mirë, vullnet politik dhe me vendosmëri, Kosova është në gjendje që të mbajë zgjedhje të lira dhe të drejta. Kjo dëshmon progresin që Kosova po e arrin në reformat e saj.

Në të njëjtën kohë, ne dënojmë ashpër sulmet në tri qendrat e votimit në Mitrovicën Veriore, të cilat penguan qytetarët që të shprehin vullnetin e tyre duke e penguar procesin zgjedhor atje. Ky incident nuk mund të ndryshojë perceptimin e suksesit të përgjithshëm të zgjedhjeve. Përpjekjet për të bojkotuar zgjedhjet në veri të Kosovës do të dështojnë.

Ne përgëzojmë Komisionin Qendror të Zgjedhjeve, OSBE-në, Zyrën e Prokurorit të Shtetit, Policinë e Kosovës, EULEX-in dhe KFOR-in për rolin e tyre specifik për t’i bërë të mundura këto zgjedhje në gjithë kompleksitetin e tyre.

Bashkimi Evropian dhe Shtetet Anëtare të BE-së të pranishme në Kosovë shpresojnë se procesi i zgjedhjeve komunale do të përfundoj me një raund të dytë të rregullt në mbarë Kosovën”, thuhet në deklaratën e përbashkët.

Profesorët e Universitetit të Teknologjisë Chalmers – Suedi dhe Universitetit të Edinburgut – Britani e Madhe, janë duke mbajtur trajnime për mbi 500 studentë të UPZ-së. Trajnimet janë duke i ndjekur studentët e të gjitha drejtimeve, duke përfshirë edhe ato në gjuhën boshnjake dhe atë turke.

Dy universitetet janë partnere me UPZ-së, dhe Wus Kosova. Trajnimet përfshijnë këto tema: Zhvillimi i karrierës, udhëzim mbi metodat e hulumtimit, shkrimi akademik dhe aftësitë e prezantimit. Në fund të trajnimit secili student pajiset me certifikatë e cila është e pranuar ndërkombëtarisht.

Këto trajnime mbahen në kuadër të projektet të TEMPUS-it për sigurimin e cilësisë dhe Zyrës së Shërbimit për përkrahje dhe mbështetje të studentëve në UPZ. Ky projekt financohet nga Komisioni Evropian dhe Ministria e Arsimit, e Shkencës dhe e Teknologjisë e Republikës së Kosovës.

Menaxhemnti i UPZ-së e vlerëson lartë realizimin e këtij projekti, që krahas punës së vazhdueshme që po bëjnë i gjithë personeli akademik, po ndikon pozitivisht në ngritjen dhe zhvillimin e cilësisë në këtë universitet. UPZ është mirënjohës të gjithë universiteteve partnere në realizmin e këtij projekti shumë të rëndësishëm për universitetin./PrizrenPress.com/