Aleanca për Ardhmërinë e Kosovës ka vazhduar fushatën zgjedhore edhe në fshatin Ratkoc, në vendlindjen e kandidatit për kryetar të Rahovecit Smajl Latifi. Para shumë të pranishmëve ka folur kryetari Nëndegës së këtij fshati Besnik Hoti. Ai tha se Ratkoci ka qenë i lënë pas dore dhe i kanë munguar gjërat elementare, “ndërsa me ardhjen e Smajl Latifit në krye të Komunës janë bërë investime që nuk kanë ndodhur asnjëherë më parë”.

“Latifi nuk i ka lënë pas dore dhe rajonet tjera të Anadrinisë dhe me krenari mund të themi se është njeriu i duhur për qeverisje edhe për katër vite”.

Ndërsa vetë kandidati Latifi tha se qeverisja e tij është bazuar në kërkesat dhe nevojat e qytetarëve.“Këto punë do të mbeten nën hijen e punëve të mëdha që do të kryhen në mandatin e plotë katërvjeçar”.

Bashkëfshatarëve tij Latifi iu ka thënë se është i kënaqur që ka pasur mundësi t’ju shërbejë interesave të tyre.

“ Prandaj vota për Aleancën për Ardhmërinë e Kosovës është votë për Ramush Haradinajn kryeministër, për të si kryetar komune dhe për qeverisje të mirë e të ndershme”

Latifi ka bërë thirrje që të votohet edhe lista e kandidatëve për Kuvendin e Komunës, respektivisht kandidatët e këtij fshati Rukije Krasniqi dhe Besnik Hoti.

Ramush Haradinaj ka folur për cilësitë e veçanta të kandidatit Smajl Latifi, duke u shprehur “të lumtë ju që e keni Smajl Latifin kaq të ndershëm e punëtorë”, dhe ka shtuar se në zgjedhjet e radhës që do të mbahen së shpejti ai do të jetë kryeministër dhe se do të merret me problemet jetike të qytetarëve.

“Qeveria aktuale e ka humbur besimin, sepse ajo nuk mund të mbahet më me numrin e deputetëve që ka, mirëpo ne jemi të zënë me zgjedhjet lokale dhe nuk po kemi kohë të merremi me ta, mirëpo në pranverë do të jem kryetar i Qeverisë së Kosovës dhe të gjitha ato punë të mira që do të bëjë Smajl Latifi do të më ketë në krah. Ne në mandatin tonë do të rregullojmë shtratin e Drinit të Bardhë, do të mbështesim sektorin e përpunimit të perimeve, si dhe do të trefishojmë ndihmat për bujqit e vyeshëm të kësaj ane, por edhe të tërë Kosovës. Prandaj, më 3 nëntorit kërkojmë që të konfirmoni mbështetjen për Smajl Latifin, sepse në këtë mënyrë i keni ndihmuar vetes dhe të ardhmes tuaj më të mirë”, tha Haradinaj./PrizrenPress.com/

Kandidati i PDK-së për kryetar të Prizrenit, Ramadan Muja, rikonfirmoi se në mandatin e ardhshëm do t’i lirojë nga taksat të gjitha veprimtaritë prodhuese të Komunës së Prizrenit. Ai këtë premtim e ka përsëritur sot gjatë një vizite që ia ka bërë NTP “WEB STAR”.

“Ndihem tepër i lumtur që investitorët nga diaspora çdo ditë e më shumë, po sjellin kapitalin e tyre në Kosovë, ku investimet e tyre po ndikojnë drejtpërsëdrejti në zbutjen e papunësisë dhe përmisimin e mirëqenjës në vendin tonë”, tha Muja.

Ai tha se si kryetar i Komunës së Prizrenit, vaxhdimisht ka përkrah investitorët të cilët kanë qenë të interesuar që kapitalin e tyre ta investojnë në komunën e Prizrenit.

“Komuna e Prizrenit posedon pesë zona industriale , të cilat janë në proces të investimeve në rregullim të infrastrukturës përcjellëse dhe ato do jenë në shërbim te investitorëve vendas dhe të huaj”.

Adnan Qovanaj, afarist nga Zvicra, i cili ka investuar rreth një milion euro në veprimtarin prodhuese te metaleve tha se në Prizren ka gjetur mbështetje të pa rezervë dhe vullnet pozitiv nga ana e kryetarit Muja, për ta themeluar biznesin e tij, i cili aktualisht posedon mbi 10 punëtor, ndërkaq planifikimet e tija afatshkurta për zhvillimin e biznesit të tij planifikon të punësoj mbi 120 punëtor./PrizrenPress.com/

Aleanca për Ardhmërinë e Kosovës(AAK) ka vijuar me fushatën zgjedhore në fshatin Xerxë dhe Ratkoc të Rahovecit.

Kandidati i këtij subjekti politik për kryetar të Rahovecit, Smajl Latifi tha se si rezultat i angazhimit të qeverisjes së tij, për më shumë se dy vjet, janë bërë investime që kanë ndikuar direkt në jetën e qytetarëve.

“ Edhe në Xerxë janë bërë investime me peshë, duke nisur nga tubëzimi i rrugëve të fshatit, rregullimi i qendrës së mjekësisë familjare, si dhe investime në rrethojat e shkollës fillore të fshatit. Krejt këto na japin të drejtë morale që të kërkojmë besimin tuaj për një mandat të plotë qeverisës”, tha Latifi.
Kryetari i AAK-së Ramush Haradinaj, ndërkaq u fokusua në ndershmërinë dhe përkushtimin e kryetarit aktual të Rahovecit, që sipas tij, ka bërë që qytetarët ta ndjejnë komunën si shtëpinë e tyre.

Haradinaj ka folur edhe për rivalët e tij, të cilët i ka cilësuar si të pasinqertë, sepse ata e kanë pasur rastin të dëshmojnë me vepra dhe jo me fjalë deklarimin e tyre se janë për të mirën e qytetarit. “Këtë nuk e kanë bërë dhe kujtohen që vetëm tani në zgjedhje të premtojnë shuma milionëshe dhe të mos bëjnë asgjë. Më pas Haradinaj ka kërkuar që të dilet në zgjedhje dhe të mos tentohet të ndryshohet qeverisja, sepse Smajli ka dëshmuar me vepra dhe jo me fjalë se e do shumë këtë vend”/PrizrenPress.com/

Partia Konservatore e Kosovës(PK) në kuadër të aktiviteteve të saja që lidhen me vlerat e Trashëgimisë Kulturore, sot kanë vizituar  objektin e ish Gjimnazit “Ryzhidie” në  Prizren.

Kandidati i PK-së për kryetar të Prizrenit, Beni Kizolli është shprehur i zhgënjyer me gjendjen në të cilën ndodhen objektet  e vjetra kulturore. ”Jemi dëshmitarë të djegjeve dhe  degradimeve të objekteve të Trashëgimisë Kulturore, para syve të popullit”.

“Kjo vije si pasojë e mungesës së vullnetit për riparime, ruajtje dhe promovim të pasurisë kulturore, e cila është tregues i qartë i nivelit të ultë të interesimit të qeverisë aktuale lokale”.

Kizolli premtoi  se  nëse PK-ja vjen në pushtet  do të ketë  kujdesje të veçantë në këtë drejtim, duke vendosur  instalime  alarmi kundër zjarrit në të gjitha objektet e Trashëgimisë Kulturore në Prizren.

“Do të bëjmë trefishimin e  buxhetit për riparimin dhe mirëmbajtjen e objekteve, hartimin e broshurave duke veçuar lokacionet e objekteve , promovimin e trashëgimisë kulturore, dhe shfrytëzimin e hapsirave të objekteve të degraduara  me çëllime socialo-kulturore, në këtë rast veçojmë hapësirën që e vizituam e që në mandatin tonë do të ndërtohet Biblioteka e re Komunale”,  tha  Kizolli.

Nga ana tjetër  kandidati për kuvend të prizrenit Shend Kabashi,  mendon  se  pa kritere për Trashëgiminë Kulturore dhe Monumentale, Europa nuk i hapë dyert për asnjë subjekt politikë apo shtet, prandaj ai thekson se do të punojnë me argumente dhe me profesionalizëm në këtë drejtim .

Lidhur me problemet në fjalë, foli edhe Kandidati për kuvend të Prizrenit Nderim Pasuli. Ai tha se trashëgimia kulturore e një populli paraqet tërësinë e vlerave shpirtërore dhe materiale të krijuara gjatë historisë së saj.Pasqyron zhvillimin ekonomik shoqërorë, politik, fetar e kulturorë në të kaluarën e tij./PrizrenPress.com/

Kandidati për Kryetar të Komunës së Malishevës, Alban Krasniqi, i shoqëruar nga deputeti i Kuvendit të Kosovës, Rexhep Selimi, nga anëtari i Kryesisë së Lëvizjes Vetëvendosje, Gani Krasniqi, si dhe nga kandidatët për Kuvendin Komunal, Habib Kryeziu dhe Mentor Shala, vizituan fshatin Mleqan, ku shpalosën alternativën qeverisëse për Komunën e Malishevës.
Gjatë fjalës së tij, deputeti Rexhep Selimi potencoi se qeverisja në ikje, në shumë raste edhe po i shantazhon qytetarët me largimin e tyre nga puna ose të të afërmve të tyre, nëse nuk votojnë për ta.

“Por, ju e keni shansin që në 3 nëntor t’i largoni vetë ata nga puna. Vetëm duke votuar Alban Krasniqin dhe duke u vendosur, së bashku me të në krye të punëve tuaja, mund të ketë zhvillim për Mleqanin dhe gjithë Komunën e Malishevës”, u shpreh Selimi.

Po ashtu, ai theksoi se Lëvizja Vetëvendosje është e përgatitur që ta mbrojë votën dhe angazhohet për një proces demokratik e të drejtë.

“Ne, me komisionerët dhe vëzhguesit tanë, do të ruajmë votën dhe nuk do të lejojmë të përsëritet vjedhja e votave si në zgjedhjet e kaluara”, përfundoi Selimi.

Anëtari i kryesisë, Gani Krasniqi, u shpreh se mbështetja e tij për Lëvizjen Vetëvendosje vjen për shkak se ajo është alternativa e vetme në rrugën e idealeve dhe përpjekjeve të shqiptarëve për dinjitet e liri, për mundësi të reja dhe zhvillim të vendit. Për këto arsye, ai ftoi edhe qytetarët e Mleqanit që më 3 nëntor t’i bashkohen ndryshimit, të cilin mund ta sjellë vetëm Lëvizja vetëvendosje.

Kandidati i Vetëvendosjes për Kryetar të Komunës së Malishevës, Alban Krasniqi, duke shpalosur programin, tha se Lëvizja Vetëvendosje në alternativën qeverisëse ka nxjerrë disa prioritete, të cilat kanë për fokus punësimin, mirëqenien, shëndetin dhe edukimin e qytetarëve të Malishevës.

Ai gjithashtu u shpreh se fshati Mleqan, njëjtë si gjithë fshatrat tjera të Komunës së Malishevës, gjatë qeverisjes së VETËVENDOSJE!-s nuk do të anashkalohet, siç ka ndodhur deri më sot nga pushtetit në ikje. “Përkundrazi, zhvillimi që zotohemi t’i sjellim gjithë Komunës, do të përfshijë edhe këtë fshat, i cili ka dhënë gjithmonë një kontribut të rëndësishëm në të mirë të vendit, si në kohë lufte ashtu edhe në kohë paqeje”, tha Krasniqi, i cili ftoi banorët e Mleqanit që të dalin masivisht në zgjedhje, duke thënë se “me daljen sa më masive në zgjedhjet e 3 nëntorit, ju do të keni mundësi ta bëni ndryshimin që i duhet Malishevës. Lëvizja Vetëvendosje ka alternativë, Lëvizja Vetëvendosje është e vetmja alternativë për ndryshime rrënjësore!”.

Në vazhdën e takimeve elektorale për zgjedhjet e 3 nëntorit, kandidati i koalicionit AAK-LDD për kryetar të Prizrenit, Lulzim Kabashi, i shoqëruar nga kryetari i Degës së AAK-së Fatmir Kastrati dhe disa nga kandidatët për Asamblenë Komunale, është takuar me banorët e fshatit Grazhdanik dhe Nashec. Ata kanë  shpalosur  platformën  zgjedhore për qeverisjen e Prizrenit.
Kandidati Lulëzim Kabashi u zotua se gjatë mandatit të ardhshëm katër vjeçar të qeverisjes së tij, secila familje në komunën e Prizrenit, do të ketë së paku një anëtar të punësuar.

“Hapja e vendeve të reja të punës, do të realizohet përmes zhvillimit ekonomik të vendit të bazuar në katër faktorë të rëndësishëm si: funksionalizimin e zonave industriale, investimet në bujqësi, investimet në turizëm dhe në sektorin e ndërtimtarisë:,  tha Kabashi.
Për  investimet në sektorin e bujqësisë foli Arsim Thaçi, i cili njëherit është edhe kandidat për Asamblenë Komunale nga ky koalicion. Ai tha se bujqësia është sektori më i mirë dhe më i lirë për të hapur vende të reja të punës.

Kurse kryetari i degës së AAK-së në Prizren Fatmir Kastrati para të pranishmëve në këtë takim tha: “Nga takimet që kemi mbajtur deri më tash me banorë të Komunës së Prizrenit, ku jemi njohur për së afërmi me problemet dhe hallet e tyre, jemi të bindur se kësaj here AAK-LDD, do të jetë koalicion fitues në komunën e Prizrenit “.
“Qëllimi jonë kryesor është që Lulzim Kabashi, kandidati jonë i përbashkët të jetë kryetar i ardhshëm i Prizrenit”. Para banorëve të fshatit Grazhdanik dhe Nashec u prezantua edhe kandidati për Asamble Komunale, Pal Geci i cili kërkoi që në zgjedhjet e 3 nëntorit të votohet numri 62 ,  koalicionit AAK-LDD, “ Ky  koalicion është e vetmja alternativë për ndryshime në Prizren”./PrizrenPress.com/