Kandidati i PDK-së për kryetar të Komunës së Prizrenit, Ramdan Muja, i shoqëruar edhe nga anëtarë të Shtabit Zgjedhor si dhe kandidatët për Kuvend Komunal, sot pas dite morën pjesë në takimin e organizuar nga ana e KDTP-së, me rastin e Festës së Kurban Bajramit, parti politike nga radhët e komunitetit turk në Prizren, e cila është në koalicion parazgjedhor me Partinë Demokratike të Kosovës.

Muja uroi të gjithë të pranishmit me rastin e Festës së Kurban Bajramit.

“Më lejoni që të gjithë besimtarëve mysliman të ua uroj Festën e Kurban Bajramit, duke dëshiruar që kjo festë të kalojë në shenjë të solidaritetit, tolerancës dhe harmonisë vëllazërore.

Uroj që në këto ditë festive të Bajramit të ritheksojmë dashurin ndaj familjes, miqve dhe fqinjëve, të respektojmë konceptet universale për të respektuar dallimet dhe të shtrijmë dorën e ndihmës dhe humanizmit në mes njëri tjetrit”, uroi Muja. /PrizrenPress.com/

Kandidati i koalicioni AAK-LDD, Lulëzim Kabashi në kuadër të fushatës zgjedhore është takuar me banorët e fshatit Atmaxhë.

Ai edhe në këtë fshat ka premtuar se gjatë katër viteve të ardhshme, synim kryesor do ta ketë zhvillimin ekonomik dhe hapjen e vendeve të reja të punës.

Duke folur për investimet në sektorin e bujqësisë, Kabashi tha se Komunës së Prizrenit, i duhet të investojë 2500 euro për të hapur një vend pune në bujqësi.

“Kjo është shumë e lehtë, por duhet vullnet dhe dëshirë për ta realizuar këtë”. Kabashi premtoi krijimin e pikave grumbulluese të qumështit, investime në minisera pa participim (fillimisht me 100 metra katrorë), investime në miniferma (3 deri në 5 krerë lopë), dhe mbi të gjitha sigurim të tregut.

Ai para banorëve të këtij fshati foli edhe për sektorin e turizmit. “Do të krijohen kushtë të tilla të cilat do të joshin turistët e huaj, që të qëndrojnë më shumë se një ditë në vendin tonë”.

Ndërkaq, sa i përket sektorit të ndërtimit, Kabashi tha se në Prizren, ndërtimi sapo ka filluar, dhe ky ndërtim duhet të organizohet, që të mos shkelen planet rregullative, si në zonën urbane ashtu edhe në zonat rurale.

”Do të përkujdesemi që gjatë katër vjetorit të ardhshëm ti kemi të gjitha planet rregullative urbane“, tha Kabashi. Ai premtoi se për katër vite do të punësoi një antarë për cdo familje në Prizren.

Para banorëve të fshatit Atmaxhë, të cilët ishin prezentë në këtë takim, foli edhe kryetari i Degës së AAK-së në Prizren, Fatmir Kastrati. Ai tha se menaxhimi i Komunës së Prizrenit nga kryetari i ardhshëm, Lulëzim Kabashi, dhe koalicioni AAK-LDD, do të jetë shembull i qeverisjes për zgjidhjen e të gjitha brengave të qytetarëve të komunës së Prizrenit./PrizrenPress.com/

Me qëllim te vetëdijesimit të qytetarëve për ruajtjen e mjedisit dhe ambientit, sot u mbajt aktiviteti vullnetar ‘’ Te punojmë së bashku për Arbanën Europiane ’’.
Ne këtë aktivitet u përfshi pastrimi i disa pjesëve të rrugëve duke përfunduar deri te pastrimi i varrezave të Arbanës.

Ky aksion kishte karakter vullnetar ku morën pjesë simpatizantët dhe strukturat e PDK-se, nëndega “Arbanës” dhe kandidatet për Kuvend Komunal nga kjo lagje.

“Partia Demokratike e Kosovës, nëndega “Arbanë” vazhdon me aktivitetet e saj për mbrojtjen e interesave të qytetarëve që të mundësojë një jetë me standarde Europiane. Me këtë gjest modest synojmë do të rrisim vetëdijen e qytetarëve që mbeturinat dhe plehrat të hidhen në vend të caktuar e jo në vende ku bëhet ndotja e ambientin, gjë që rrezikon edhe shëndetin e qytetarëve”, thanë përfaqësuesit e nëndegës së PDK-së në Arbanë.
Ky aksion është përkrahur edhe nga ndërmarrja “Eko Regjioni” ku siguroi makineritë e nevojshme për pastrimin e mjedisit.

“Ne do të vazhdojmë me aktivitete të tilla që kësaj lagje ti krijojmë kushte me standard Europiane. Ambienti i pastër dhe i gjelbëruar, përpos pamjes së bukur që kanë, ndikon drejt për drejti edhe në ruajtjen e shëndetit të njerëzve”./PrizrenPress.com/

Kandidati i PDK-së për kryetar të Prizrenit, Ramadan Muja, është takuar me partitë të minoriteteve VAKAT, dhe NDS, me të cilat ditë më parë subjekti i tij politk ka nënshkruar koalicion parazgjedhor.

Muja, ka falënderuar subjektet politike të koalicionit për bashkëpunimin e deritanishëm në këtë pjesë të fushatës zgjedhore. “Jam i bindur se falë këtij bashkëpunimi fitorja e përbashkët do jetë e pashmangshme në zgjedhjet e 3 nëntorit”, tha Muja.

Edhe bartësi i listës së PDK-së, Nijazi Kryeziu, falënderoi këto subjekte politike për bashkëpunimin e deritanishëm, dhe për realizimin e projekteve të përbashkëta.

“Dy partnerët e koalicionit VAKAT dhe NDS janë partnerë strategjik dhe njëkohësisht pjesë integrale të PDK-së në procesin politik që udhëhiqet nga PDK për qytetin dhe qytetarët, dhe demokracinë model në qytetin e Prizrenit”, tha Kryeziu.

Edhe përfaqësuesit e koalicionit nga radhët e VAKAT dhe NDS-it thanë se mirëqeverisja e deri tanishme e qeverisë lokale dhe e kryetarit Muja, është dhe do jetë një faktor determinant dhe tepër i rëndësishëm në fitoren e pakontestueshme të PDK-së dhe koalicionit me datën 3 nëntor./PrizrenPress.com/

Prishtina zyrtare ka pranuar të mërkurën matësin e zhvillimit të Kosovës nga pikëpamja e Brukselit.

Presidentja e Kosovës, Atifete Jahjaga, ka marrë të mërkurën Raportin e progresit nga përfaqësuesi i Posaçëm i Bashkimit Evropian në Kosovë, Samuel Zbogar, sipas të cilit, ai është i mirë për Kosovën, por kërkon qasje më të thellë në reforma.

Kryetarja e shtetit, u zotua se gjetjet në raport do të adresohen me seriozitet.
Ngecjet e pasqyruara në këtë dokument, për njohësit e zhvillimeve në vend dhe të proceseve të integrimeve evropiane, janë veçse reflektim i përditshmërisë kosovare.

Naim Rashiti nga Grupi Ndërkombëtar i Krizave thotë për Radion Evropa e Lirë se, Kosova vazhdon të mos tregojë rezultate të mira në reformën e rendit dhe ligjit dhe atë të administratës publike.

“Në këto dy fusha, Kosova ende mbetet mbrapa. Në mënyrë të detajuar shtjellohen ngecjet, edhe po shihet se gjithnjë e më shumë, sa më thellë të futet Kosova në procesin e integrimit evropian, llupa e BE-së do të jetë edhe më e madhe. Prandaj, defektet e gjetura në rend e ligj dhe në administratë publike, janë defekte serioze, të cilat, po të kishte vullnet politik, do të merrte shumë kohë dhe vite, për t’i adresuar në mënyrë efektive”, thotë Rashiti.

Ai vlerëson se ky raport i progresit, është më ndryshe në krahasim me ata të mëhershmit, pasi është më i detajuar, për faktin se Kosova është në marrëdhënie tjetër me Bashkimin Evropian.

Raporti si bazë, sipas tij, ka në ballë të saj marrëveshjen për normalizimin e raporteve Kosovë-Serbi, i cili “ka qenë një prej kritereve kyçe apo kryesore politike për të dy vendet”.

“Nga vetë raporti vërehet se Kosova tashmë është në një fazë ndryshe, tjetër, në marrëdhëniet me BE-në, që bazohet konsiderueshëm në marrëveshjen dhe negociatat për MSA, dhe si i tillë, e trason rrugën se kriteret e ardhshme me vlerësimet për Kosovën në të ardhmen, do të jenë në kuadër të MSA-së”, shprehet ai.

Por, përderisa ky format do të jetë pika e fokusit për vlerësimin e ardhshëm të Komisionit Evropian për Kosovën, për dikë nuk është e mjaftueshme.

Njohës i integrimeve evropiane, Shenoll Muharremi, konsideron se Qeveria në Prishtinë nuk po bën sa duhet për qytetarin dhe ngritjen e mirëqenies së tij.

“Raporti (i progresit) ka shumë elemente, ku faktikisht kërkon një qeverisje shumë më të mirë, ku kërkon që investimet të mos jenë vetëm në rrugë, por ato të bëhen edhe në sektorin e drejtësisë, që të luftohet korrupsioni, që Kosova ta adresojë çështjen e problemit ekonomik që e ka, me një papunësi jashtëzakonisht të madhe”, thekson Muharremi.

Sipas Muharremit, këto elemente të reformës më të thellë në gjyqësor, reformës zgjedhore, dhe të administratës publike, nuk po trajtohen seriozisht nga Qeveria e Kosovës.

“Kështu që përderisa ka pasur progres në aspekt politik me MSA-në, dhe me dialogun me Serbinë, Kosova po vazhdon të vendnumërojë, sa i përket zhvillimit ekonomik, reformave në administratë, në mënyrë që të krijojë një administratë dhe të ketë një qeverisje, e cila i mundëson Kosovës të gjenerojë punësim, dhe të përmirësojë jetën e qytetarit”, shton Muharremi.

Sipas tij, ekzekutivi i Kosovës nuk duhet të vazhdojë të “ndërtojë autostrada” sikur të kishte “buxhetin e Gjermanisë, në një vend ku problemet lokale janë furnizimi me ujë të pijshëm dhe menaxhimi i ujërave të zeza dhe mbeturinave”.

Komisionari Evropian për Zgjerim Stefan Fule pritet të vizitojë Kosovën pas dhjetë ditësh.

Me ardhjen e tij, të cilën e ka paralajmëruar në rrjetin social Tëitter për 28 tetor, do të hapen edhe negociatat ndërmjet Kosovës dhe BE-së për Marrëveshjen e Stabilizim-Asociimit.

Partia Konservatore e Kosovës ka vizituar disa familje të shquara që kanë kontribuar në zhvillimin e shoqërisë prizrenase. PK-ja ka çmuar lartë mundin dhe sakrificën e tyre nëpër kohëra të ndryshme dhe njëkohësisht ju kanë uruar Festën e Kurban Bajramit.

Kryetari i Partisë Konservatore të Kosovës, Munir Basha, tha se këto familje kanë ndikuar në mënyrë të drejtpërdrejt në ngritjen e cilësisë së jetesës së qytetarëve dhe nivelit të zhvillimit ekonomik, politik dhe kulturor të shoqërisë prizrenase.

“Ju veteranët e arsimit, shkencës, udhëheqjes, luftës, mjekësisë dhe fushave të tjera jeni ata që keni ndikuar në mënyrë të drejtpërdrejt në ngritjen e cilësisë së jetesës së qytetarëve dhe nivelit të zhvillimit ekonomik, politik dhe kulturor të shoqërisë prizrenase. Ju jeni ata që fal mundit tuaj nëpër kohëra të vështira keni mundësuar që fëmijët tanë ti gëzojnë këto të mira tani”, tha Basha.

Ndërsa, kandidati i PK-së për kryetar të Komunës së Prizrenit, Beni Kizolli, tha se do të mundësojë që kontributi i tyre të vlerësohet përgjithmonë dhe që veteranët të kenë vendin meritor në shoqëri.

“Nëpërmjet punës suaj dhe brezave të tërë ju keni mundësuar që Prizreni të jetë ndryshe, dhe Partia Konservatore e Kosovës do të mundësojë që kontributi juaj të vlerësohet përgjithmonë dhe që Ju veteranët të keni vendin meritor në shoqëri pasi që edhe Partia Konservatore e Kosovës është ndryshe dhe bashkëndjenë me mundin dhe sakrificën tuaj”, tha Kizolli.

Në kuadër të programit të saj, PK-ja çmon këto vlera, traditat dhe përpjekjet e popullit tonë për përmirësimin e situatës, ngritjen e standardit jetësor dhe mirëqenies sociale, të cilat do të shërbejnë si frymëzim për veprimtarinë tonë konkrete në interes të qytetarëve të Prizrenit dhe të Kosovës. /PrizrenPress.com/