Ministria e Kulturës, Rinisë dhe Sportit në një ceremoni rasti ka shpërndarë sot rreth 5000 libra për 30 biblioteka komunale, e ku hyjnë rreth 70 tituj. Kjo është hera e parë që MKRS-ja blen dhe shpërndanë libra për bibliotekat komunale, përveç mbështetjes që jep edhe në konkursin për projektet kulturore. Librat janë të botuara në dy vitet e fundit dhe janë blerë nga botuesit përmes një konkursi publik nga Këshilli i Librit. Në këtë konkurs, Këshilli kishte vendosur të blejë 55 tituj, e po ashtu edhe kishte mbështetur financimin e botimit të titujve të ri , si dhe për herë të parë edhe të botimit të revistave letrare.

Në ceremoni, të mbajtur në Bibliotekën Kombëtare dhe Universitare të Kosovës ka marrë pjesë Ministri i Kulturës, Rinisë dhe Sportit, Memli Krasniqi, Drejtori i BKUK-së, Sali Bashota si dhe drejtorët e bibliotekave komunale.

Ministri Krasniqi tha në fjalën e tij se ngjarja sot është fillimi i një programi të ri të mbështetjes për librin dhe bibliotekat, pasi për herë të parë MKRS-ja po blen titujt e ri të botuar dhe ata po ua shpërndanë bibliotekave komunale. Ministri Krasniqi tha se në dy vitet e fundit është dyfishuar mbështetja për bibliotekat dhe librin, por edhe në përgjithësi për fushën e kulturës.

“Mendoj se ky fond është jashtëzakonisht i rëndësishëm tash kur edhe ka filluar viti shkollor në arsimin para universitar e tash së shpejti edhe ai universitar, sepse po krijon mundësi më të shumta për nxënësit dhe studentët. Besoj se më format e reja të përkrahjes që MKRS-ja po zbaton fondi i bibliotekave tona do të jetë çdo vit edhe më i pasur dhe më afër lexuesit”, ka thënë Ministri Krasniqi, teksa ka përmendur se tashmë një aktivitet i tillë është tradicional dhe MKRS-ja do të jetë gjithnjë afër bibliotekave që fondi i tyre sa më shumë të pasurohet.

Drejtori i BKUK-së, Sali Bashota duke vlerësuar këtë mbështetje të MKRS-së për bibliotekat, shtoi se BKUK-ja si një institucion qendror i bibliotekarisë në Kosovë, do të punojë edhe më shumë në të ardhmen që bibliotekat komunale të zhvillohen dhe pasurojnë sa më shumë raftet e tyre.

Në emër të bibliotekave ka folur Engjell Berisha, drejtor i bibliotekës komunale në Gjakovë. Ai ka falënderuar MKRS-në që ka nisur një iniciativë si kjo, sipas tij, mjaftë e dobishme, pasi ka thënë se bibliotekat komunale kanë nevojë gjithnjë për tituj të rinj./PrizrenPress.com/

Papa Gjon Pali II lumturoi në tetor të vitit 2003 Nënën Terezën e Kalkutës, duke e përshpejtuar shenjtërimin e saj për ndihmën e dhënë të varfërve. “Me autoritetin tim apostolik, ne garantojmë se shërbëtorja e nderuar Nënë Tereza e Kalkutës do të quhet e lumturuar tani e në vazhdin”, deklaroi atëherë Papa.Më shumë se 150 000 pelegrinë, turistë dhe përkrahës të besimit jo të krishterë morën pjesë në ceremoninë e lumturimit në meshën e zhvilluar në sheshin e Shën Pjetrit në Vatikan.

Në fakt, që kur Nënë Tereza ndërroi jetë në vitin 1997, çdo përvjetor te lindjes apo të ikjes së saj qindra vetë grumbullohen në varrin e saj, duke u lutur dhe duke kënduar. Murgeshat e urdhërit “Misionaret e Bamirësisë”, që ajo themeloi 55 vjet më parë në Kalkuta, çdo vit vendosin lule para memorialit prej çimentoje të bardhë.

Angje Gonxhe Bojaxhiu, që më vonë e ndryshoi emrin në Nënë Tereza, lindi me 1910 nga prindër shqiptarë. Ajo i mori mësimet e para në një shkollë në qytetin e Shkupit dhe në moshën 18 vjeçare u dorëzua murgeshë. Pasi u specializua në Irlandë u vendos në Indi, ku në vitin 1950 themeloi urdhërin e saj të murgeshave të quajtur Misionarët e Bamirësisë.

Nga ky moment Nenë Tereza do të bëhej nënë e të gjithëve dhe jetën e saj do t’ia dedikonte tërësisht të varfërve.Urdhëri i Nënë Terezës numëron mbi 4000 misionarë dhe është shtrirë në mbi 100 vende të botës, kur nuk duhet harruar se ajo e filloi aktivitetin vetëm me dy pasuese. Nëne Tereza nuk e pranoi asnjëherë famën. Ajo ka thënë se gjithçka e bënte për hir të dashurisë së Zotit. Bëri një jetë të thjeshtë, pa pasuri.
Nënë Tereza udhëtonte për të kryer misionin e saj me një automjet gjysmë të shkatërruar. Kur Papa Pavli VI kryente një vizitë në Indi në 1964 i dhuroi asaj limuzinën e tij. Ajo e shiti atë për të siguruar fonde për koloninë e lebrozëve, të cilët i ndihmonte.
Fama e saj u përhap kur gazetari i njohur britanik, Nugerigj, shkroi një libër dhe xhiroi një film për jetën e saj të titulluar “Diçka e bukur për zotin”. Ish-ateist ai tha se ajo kishte influencuar jashtëzakonisht shumë në konvertimin e tij katolik. Liderë nga e gjithë bota e kanë vizituar atë. Ish-kryeministria e Indisë, Indira Gandi, pas takimit me të bëri këtë koment: “Të takosh Nënë Terezën do të thotë të përjetosh ndjenjen e inferioritetit dhe atë të pushtetit të madh të mirësisë dhe të fuqisë së dashurisë”. Por duhet thënë se jo gjithkush e vlerësonte punën e saj. Edhe vetë kisha katolike në fillim ishte plot dyshime. Prifterinjtë e besimit hindu ishin armiqësorë në fillim pasi mendonin se ajo po përpiqej për t’i konvertuar hindutë në katolikë. Por ajo fitoi admirimin e të gjithëve kur u kujdes në maksimum për një prift hindu, që po vdiste dhe më tej insistoi që atij t’i bëhej një varrim sipas të gjitha riteve të besimit të cilit i takonte. Prej këtij momenti hindut u shndërruan në përkrahësit e saj më të zjarrtë.

Debatet u shtuan tepër pasi ajo u deklarua kundër mjeteve artificiale të kontrollit të lindjeve dhe veçanërisht kundër abortit. Kundërshtaret e saj thanë se qendrimi i Nënë Terezës ishte i demshëm veçanerisht në Indi, ku sipas tyre, mbipopullimi ishte shkaktar kryesor i varfërisë masive. Por ajo vazhdoi të predikonte mesazhin e saj të dinjitetit njerëzor dhe respektit për çdo qënie njerëzore të lindur apo jo.
Kur mori çmimin Nobel për Paqe në vitin 1979 ajo beri këtë apel: ” Shkatërrimtari më i madh i paqes së sotme është thirrja e një fëmije të pafajshëm ende të palindur. Nëse një nënë vret femijën që mban në barkun e saj atëherë çfarë mbetet për ty dhe mua?