Është liruar biznesmeni Aziz Tafaj që ishte ndaluar të martën nga policia e krimeve ekonomike.
Tafaj është njëri nga aksionarët e ish-ndërmarrjes shoqërore NBI Suhareka që pas privatizimit mori emrin “Agrokosova Holding”.
Lajmin për lirimin e tij e bëri të ditur për KALLXO.com avokatja e Tafajt, Shpresa Berisha.
Seanca e caktimit të masës së sigurisë për Tafajn u zhvillua në Departamentin e Krimeve të Rënda të Gjykatës Themelore në Prishtinë.
“Prokurori i rastit ka kërku me u caktu paraburgim ndaj Aziz Tafajt, po gjykata ia ka refuzu kërkesën me arsyetimin se nuk ka bazë për caktimin e paraburgimit,” tha avokatja Berisha.
Ajo njoftoi se klienti i saj tashmë ndodhet në liri.
Avokatja tregoi edhe për çfarë po dyshohet biznesmeni Aziz Tafaj.
“Vepra për të cilën dyshohet është keqpëdorim i autorizimit në ekonomi, dyshohet se ka keqpërdorur një autorizim të “Agrokosova Holding”-ut,” sqaroi avokatja.
Ajo shtoi se pretendimet e tilla nuk qëndrojnë.
Aziz Tafaj bashkë me partnerin e tij italian në “Agrokosova Holding” Roberto Migoto dhe Shaban Tafajn qe arrestuar edhe në tetor të vitit të kaluar, pasi kishte tentuar të hyjë në ambientet e kësaj kompanie.
Në shtator të 2014-ës, aksionarit tjetër, gjithashtu italian të ish-NBI Suharekës Gianfranco Fantineli gjykata ia lejoi hyrjen në këtë ndërmarrje.
NBI Suhareka u privatizua në vitin 2006.