Deputetët opozitarë u përpoqën të pamundësojnë seancat përmes hedhjes së gazit lotsjellës, por koalicioni miratoi buxhetin e mjerimit, shkel e shko, duke e akuzuar pakicën parlamentare për uzurpim të Kuvendit. Beteja opozitare kundër Asociacionit dhe Demarkacionit vazhdon, ndërsa vendi është në krizën më të madhe të pasluftës
Seanca e Kuvendit nisi dje si të gjitha seancat e javëve të fundit. Pak çaste pasi filloi kryeparlamentari Kadri Veseli të flasë, përsëri opozita hodhi gaz lotsjellës, duke bërë kështu të pamundur vazhdimin e seancës në kushte normale. I gjithë objekti i Kuvendit ishte nën masa të rrepta sigurie, çdokush kontrollohej dhe asnjë gjë nuk ishte në normalitet. Menjëherë pas hedhjes së gazit lotsjellës, kësaj radhe nga Pal Lekaj i AAK-së dhe Glauk Konjufca i VV-së, ata folën për medie duke përsëritur qëndrimet e pathyeshme të opozitës së bashkuar. Konjufca, ndër të tjerash, edhe pranoi që ai hodhi gazin lotsjellës. “Po, sot jam njëri që ka hedhur personalisht gazin lotsjellës,” tha Konjufca për medie pasi seanca u ndërpre.
“Veprimet tona po bëhen vetëm sa për ta pamundësuar punën për të paralizuar Qeverinë brenda Kuvendit të Kosovës. Kjo është shtëpia ku banojmë dhe aty po veprojmë të mund ta pengojmë punën e Qeverisë,” tha Konjufca. Ai bëri të ditur se me këto veprime opozita po dëshiron që t’i bëjë Qeverisë presion për tërheqjen e nënshkrimeve nga marrëveshjet. Konjufca vazhdoi të flasë se si realisht vullneti prej Malit të Zi ekziston për rishqyrtim të Marrëveshjes për Demarkacionin, duke përmendur reagimet e autoriteteve atje të krijuara pas situatës momente politike në Kosovë../kosova sot/