Departamenti për Krime të Rënda i Gjykatës Themelore të Prizrenit ka vendosur një muaj paraburgim ndaj dy të dyshuarve për falsifikim të një dokumenti zyrtar.
I pandehuri me inicialet Z.S. nga Mlladenovc të Republikës së Serbisë, dyshohet se ka kryer veprat penale ‘falsifikim i dokumenteve’ dhe ‘deklarim i rremë’, kurse i pandehuri i dytë me inicialet H.A. nga Ferizaj, dyshohet se ka kryer veprën penale ‘keqpërdorim i pozitës apo autoritetit zyrtar’.
“Të pandehurit do të mbahet në paraburgim në kohëzgjatje prej 1 (një) muaji, i cili do të llogaritet prej kohës së ndalimit, data 16.12.2015 dhe do të zgjasë deri me datën 15.01.2016”, njofton zëdhënësja e gjykatës, Afërdita Kicaj.
“Të pandehurit dyshohen për shkelje të Kodit Penal, sepse në bashkëpunim me njëri tjetrin me dije vënë në lajthim një dokument publik, me qëllim të vërtetimit të një çështje të pavërtetë, duke përpiluar, falsifikuar autorizimin si dhe nënshkrimin, të cilën e vërtetojnë tek noteri i cili me qëllim të përfitimit të dobisë pasurore për vete, ka vërtetuar të njëjtën dhe me atë rast, kanë shitur një parcelë katastrale e cila ka qenë pronë e të ndjerit GJ.A.- tani trashëgimtares D.A., duke i shkaktuar dëm material të njëjtës në shumën prej 50.800 Euro”, bën të ditur Kicaj. /PrizrenPress.com