Teqeja e Planejës ishte njëra ndër teqetë më atdhetare për shekuj të tërë. Sheh Sylejmani ishte bashkëpunëtor i Hasan Prishtinës e Isa Boletinit. Rrahman Shehu ishte bashkëpunëtor i ngushtë i Shtjefen Gjeçovit, Muharrem Shehut, që ishte pjesëtar i kësaj teqeje, por kishte edhe miqësi me gjithë Hasin
Teqja e Planejës në komunën e Prizrenit ishte strehimore e pafund e atdhetarisë. Dr. Nexhat Çoçaj, studiues i etnologjisë është shprehur për “Kosova Sot” se vendet e kultit, që kanë të bëjnë pikërisht me tarikatin, që si drejtim fetar islam edhe sot është i përhapur në Has.
“Ndër vendet më të njohura të kultit islam është Varri i Sari Salltëk Babës, që në popull njihet si Varri i “Babës Pashtrik” e më pas vijnë teqetë sipas radhës që janë themeluar në fshatrat e Hasit, ku gjithsesi ndër teqetë më të vjetra jo vetëm në Has, por edhe në Kosovë është Teqeja e Babës Mustafë, ndërsa ndër teqetë më të dëgjuara për aktivitetin kombëtar janë teqetë e Sheh Tahirit në Planejë dhe ajo e Dervish Salihut në Lugishtë”.
Sheh Tahiri kishte shërbyer si udhëheqës i disa institucioneve arsimore në Stamboll
Teqeja e Sheh Tahirit në Planejë, u ngrit në mesin e dytë të shekullit XIX, po në atë vend ku gjendet edhe sot. Themelues i Teqesë në Planejë është Sheh Tahiri, i biri i Imerit.
“Ndonëse nuk kemi të dhënat e sakta për jetën dhe veprën e Sheh Tahirit të parë, për të cilin mendohet se ishte bashkëkohanik i atdhetarit Ymer Prizreni, mendojmë se Teqeja e Planejës është themeluar përafërsisht rreth vitit 1853, pra para 159 viteve. Këtë përllogaritje të themelimit e mbështes në numrin e kuburëve në tyrben e kësaj teqeje, në udhëheqësit e teqesë dhe në analizën e disa rrethana historike, që lidhen me kontributin e kësaj teqeje”, shprehet Çoçaj.
Shton se Sheh Tahiri, i cili kishte arritur të shkollohet, për një periudhë kohore kishte shërbyer si udhëheqës i disa institucioneve arsimore në Stamboll.
“Në mungesë të të dhënave historike, këto supozime mund t’i bazojmë vetëm në gojëdhëna, të cilat jo se nuk kanë bazë, por mbetet detyrë e studiuesve e në veçanti e familjarëve, që të hulumtojnë në arkivat e Stambollit, kohën kur ai ka qenë drejtor i shkollave të mesme në Stamboll. Në anën tjetër, Sheh Tahiri, themelues i teqesë në Planejë, për pak kohë kur ishte kthyer nga Stambolli ka shërbyer kadi në Prizren”./Kosova Sot/