Në 17-vjetorin e vrasjes, është nderuar sot vepra dhe heroizmi i Ekrem Rexhës, i njohur në luftën për çlirimin e Kosovës si komandant “Drini”.
“Drini” u vra para shtëpisë së tij në lagjen “Bazhdarhane” në rrethana misterioze, në mëngjesin e 8 majit të vitit 2000, në kohën kur po punonte si drejtor komunal për Emergjencë. Në momentin kritik ai kishte dalë të ndezte veturën për të shkuar në punë, ndërsa ishte qëlluar me armë automatike, derisa po shikonte gomën e parë të veturës, nga ana e shoferit që ishte shpuar qëllimisht.
Për zbardhjen e vrasjes, nën drejtimin e ndërkombëtarëve në Prizren janë mbajtur dy procese gjyqësore, por në mungesë provash, të akuzuarit, ish-pjesëtarë të UÇK-së, por edhe ish-shokë të “Drinit”, janë liruar.
Procesi për të zbardhur vrasjen më vonë u zhvendos në Prishtinë, ku në një proces tjetër me drejtësinë u përball ish-komandanti i Zonës së Dytë të TMK-së, gjeneral Sali Veseli, që ishte akuzuar për bashkëpunim në vrasje. Shkalla e dytë e Gjykatës e pat prishur aktgjykimin e Gjykatës në Prizren, ndërsa siç është thënë në mungesë provash liroi të akuzuarit.
Në anën tjetër bashkëshortja e “Drinit”, Hajrie Rexha, thotë se 17 pas vrasjes së burrit është e pakënaqur me organet ndërkombëtare dhe këto vendore të drejtësisë, pasi e tëra ka rezultuar pa suksese rreth ndriçimit të rastit, që ndodhi në qendër të Prizrenit.
“S’doli asgjë nga 32 seancat gjyqësore e as ato në Gjykatën Supreme, edhe pse ne kemi ndihmuar gjykatat me dëshmitë dhe dëshmitarët tanë”, ka thënë ajo. Ajo thotë se në familjen e saj pas vrasjes kanë qenë të gjithë liderët politikë dhe ata ushtarakë të vendit.
Me mallin për babanë janë rritur edhe dy fëmijët.
Hajria rrëfen se fëmijëve ua ka treguar të vërtetën për rastin e babait, pasi ka lexuar libra botërore, sipas të cilave fëmijët duhet ta dinë të vërtetën dhe tregon se i tërë angazhimi i saj tashmë është në edukimin e tyre.
Po ashtu, bashkëshortja e komandant “Drinit” thotë se dëshira e saj jetësore është zbardhja e vrasjes së burrit, pasi duke njohur karakterin dhe sjelljen e tij të mirë me bashkëluftëtarë dhe familjarë, në asnjë mënyrë nuk mund t’i kuptojë motivet e vrasjes.
“Pas luftës nuk ka pëlqyer t’i sistemojë njerëzit që nuk kanë kontribuuar, por ata që ndihmuan lirinë e vendit duke i dhënë prioritet atyre me gjendje më të rëndë ekonomike”, tregon ajo.
Komandant “Drini” ka themeluar Shoqatën e Veteranëve të Luftës në Prizren, që ishte e para e këtillë në vend./PrizrenPress.com/