Shkruan:Ymer Hoxha
Viti 2014 ishte vit i rezultateve konkrete të punës dhe e hapjes së mëtejme të Gjykatës Themelore të Prizrenit ndaj qytetarëve. Jam i lumtur që bëj pjesë në mesin e një ekipi të përkushtuar profesionistësh, të cilët janë dëshmia më e mirë e vullnetit të përkthyer në shërbime më të mira për qytetarët. Gjatë vitit 2014, Gjykata jonë i tejkaloi të gjitha parashikimet e punës, si në aspektin e trajtimit të lëndëve, po ashtu edhe në promovimin e standardeve të
transparencës dhe llogaridhënies.
Një pjesë e rëndësishme e suksesit të vitit 2014 i takon edhe bashkëpunëtorëve të shumtë të Gjykatës, të cilët ishin dhe vazhdojnë të jenë vlerë e shtuar e angazhimit për një gjykatë të hapur.
Para disa muajsh, hapëm një dritare të re të transparencës, duke e publikuar numrin e parë të buletinit informativ. Jemi tejet të motivuar që këtë mjet të transparencës po vazhdojmë ta mbajmë gjallë dhe para jush po e sjellim edhe numrin e dytë të buletinit. Ky publikim periodik ka për synim të ofrojë informacion mbi punën e gjykatës, statistikat e trajtimit të lëndëve, aktivitetet dhe projektet, qasjen e qytetarëve në gjykatë, përfshirjen mediale, dhe të tjera në shërbim të transparencës dhe llogaridhënies karshi qytetarëve.
Gjykata Themelore e Prizreni është gjykatë e hapur, e cila përrpiqet t’i përfshijë në punën e saj të gjithë qytetarët e Prizrenit. Ne tanimë kemi krijuar një traditë
të mirë të bashkëpunimit me shumë partnerë, e ndër ta edhe me shkollat e qytetit.
Një nga shembujt e shumtë është edhe marrëveshja e bashkëpunimit me shkollën e mesme Ymer Prizreni, drejtimi i juridikut, përmes së cilës, nxënësit e kësaj shkolle nga katër orë në javë janë pjesë vëzhguese e seancave gjyqësore. Synimi ynë është që gjatë vitit 2015 të shumëfishojmë numrin e partneriteteve, gjithnjë në shërbim të hapjes së Gjykatës.
(Autori është kryetari i Gjykatës Themelore në Prizren.Shkrimi është marrë nga Buletin informativ “Gjykatë e Hapur”)