Familja Qatalli nga fshati Duhël i komunës së Suharekës ka hapur dyert e mortit për djalin e tyre. Trim Qatalli kishte marrë rrugën nga Gjermania për në Kosovë, për të kaluar pak kohë me familjarët e tij. Por, ky udhëtim doli të jetë i fundit për të. Express sjell rrëfimin nga familja.
30 – vjeçari, zgjodhi ditën e martë të kryente vetëvrasjen. Dyshohet se ai qëlloi veten e tij me armë, pak metra larg shtëpisë së tij.
Express të martën ka qëndruar në familjen e viktimës.
Ata thonë se nuk i dinë motivet që e quan djalin e tyre të kryente këtë akt.
Vëllai i viktimës ka thënë se familjari i tij nuk kishte shfaqur tek ata ndonjë shqetësim, dhe as nuk kishte ndonjë problem shëndetësor.
Sipas tij, me rastin në fjalë tashmë po merren organet e hetuesisë.
“Na falni, nuk mund të flasim më shumë për këtë çështje. Me të gjitha tashmë po merret policia e Kosovës. Ai nuk ka pasur ndonjë problem. Tek ne nuk ka shfaqur ndonjë gjë”, thotë vëllai i viktimës.
E ndërkohë për këtë rast janë deklaruar edhe zyrtarë nga policia e Kosovës për rajonin e Prizrenit.
Zëdhënësi i policisë, Vesel Gashi ka dhënë detaje për këtë rast.
Sipas tij, bazuar në hetimet e para bëhet fjalë për vetëvrasje, megjithëse hetimet po vazhdojnë.
”Policia ka marrë një informacion se në orën 13:30 është gjetur një trup i pa jetë. Policia ka marrë informatën dhe menjëherë ka dal në vendin e ngjarjes. Në bazë të informatave lënë të kuptohet se nuk ka ndonjë dyshim se këtë person mund ta ketë vrarë dikush. Pasi që jemi në fazën fillestare nuk mund të japin detaje të tjera. Trupi i pajetë i viktimës është në autopsi. Por nga ajo se çka është gjet në vendin e ngjarjes lë të kuptohet se ky rast mund të jetë për vetëvrasje”, ka thënë Vesel Gashi nga policia rajonale e Prizrenit.
Trupi i pa jetë i Trimit është dërguar për autopsi në Institutin e Mjekësisë Ligjore. I njëjti është varrosur sot gjatë ditës na varrezat e fshatit Duhël.