Kryetari i Prizrenit, Shaqir Totaj, në konferencën e sotme të jashtëzakonshme deklaroi se performanca e Komunës së Prizrenit është në ngritje dhe si e tillë do të vazhdoj me punë e shembuj konkret.
“Ka pasur disa shkrime në portale dhe në rrjete sociale nga persona të pa informuar mirë sa i përket grantit të performancës që gjoja Komuna e Prizrenit nuk i ka plotësuar kriteret për këtë grant. Ritheksoj se vlerësimi i fundit i performancës së komunave është bërë për vitin 2021 dhe jo për vitin 2022 apo 2023, ndërsa, ne do të vazhdojmë ta informojmë opinionin publik në kohë reale dhe informacione të rëndësishme” – u shpreh Kryetari Totaj.
Kryetari i Prizrenit tha se lajmet e rreme dezorientojnë popullin, ndërkaq, puna, performanca dhe suksesi do të jetë përgjigjja e ekzekutivit të Komunës së Prizrenit.
Kryetari Totaj, më tej potencoi se Instituti Demokratik i Kosovës (KDI), përmes një raporti e ka vlerësuar me nota të larta Komunën e Prizrenit sa i përket transparencës.