Kryetari i Komunës së Malishevës, Ekrem Kastrati, ka vizituar sot Kishën Katolike në fshatin Kërvasar, ku është pritur nga Don Fran Kolaj, një intelektual i respektuar dhe me vlera të larta kombëtare, përcjell PrizrenPress.
Në këtë ditë të shënuar të Krishtlindjeve, Kastrati theksoi rëndësinë e harmonisë ndërfetare, një vlerë që është ruajtur dhe promovuar për shekuj në këtë rajon. Ai ka theksuar se kjo harmoni është një element i rëndësishëm i bashkëjetesës dhe mirëkuptimit ndërmjet komuniteteve.
“Si çdo vit, edhe sot, në ditën e Krishtlindjeve, pata nderin të vizitoj Kishën katolike në fshatin Kërvasar, ku u pritëm nga z. Don Fran Kolaj, intelektual i respektuar dhe me vlera të larta kombëtare. Në cilësinë time si kryetar i Komunës së Malishevës, desha t’i shpreh urimet më të ngrohta të gjithë qytetarëve tanë të besimit katolik. Gëzuar Krishtlindjet dhe për shumë mot!”, tha Kastrati./PrizrenPress.com/
