Komisioni për hartimin e planit të punës së Kuvendit të Komunës së Malishevës ka mbajtur sot mbledhjen e parë, ku është bërë konstituimi i tij dhe zgjedhja e kryesuesit.
Në njoftim thuhet se gjatë kësaj mbledhjeje, anëtarët e komisionit zgjodhën kryesuesin e tij, Argjend Thaçin, i cili njëkohësisht është edhe kryesues i Kuvendit të Komunës së Malishevës, përcjell PrizrenPress.
Po ashtu, komisioni, i përbërë nga përfaqësues të subjekteve politike në Kuvendin e Komunës, Zyra e Kryetarit të Komunës dhe përfaqësues të shoqërisë civile, ka nisur punën për hartimin e planit të punës.
“Në vijim, komisioni ka shqyrtuar planin e punës dhe ka hartuar draftin fillestar. Ky draft do të kalojë në procedurat e nevojshme ligjore para se të miratohet nga Kuvendi i Komunës”, theksohet në njoftim.
Plani i punës që do të miratohet do të përcaktojë drejtimet dhe organizimin e punës së Kuvendit për vitin 2025./PrizrenPress.com/
