Kryetari i Komunës së Prizrenit, Shaqir Totaj, ka nënshkruar sot një Marrëveshje Bashkëpunimi me Policinë e Kosovës dhe Postën e Kosovës, me qëllim përmirësimin e efikasitetit të shpërndarjes së dokumenteve dhe forcimin e koordinimit ndërmjet institucioneve.
Sipas komunës, marrëveshja ka fokus të veçantë shpërndarjen e dërgesave dhe gjobave të trafikut rajonal.
“Kryetari Shaqir Totaj nënshkroi sot Marrëveshje Bashkëpunimi me Policinë e Kosovës dhe Postën e Kosovës për kryerjen e shërbimeve postare, me fokus të veçantë në shpërndarjen e dërgesave dhe gjobave të trafikut rajonal, që synon përmirësimin e efikasitetit të shpërndarjes së dokumenteve dhe forcimin e koordinimit ndërmjet institucioneve”, thuhet në njoftimin e komunës, përcjell PrizrenPress.
Në fillim të prillit, Policia e Kosovës ka filluar dërgimin e gjobave të trafikut në adresë të pronarëve të automjeteve që identifikohen se kanë bërë kundërvajtje.
Gjobat për shkeljet në trafik – që do të identifikohen përmes pajisjeve inteligjente – do t’iu dërgohen pronarëve të automjeteve përmes Postës së Kosovës dhe platformës e-Kosova.
Sipas policisë, përmes pajisjeve inteligjente identifikohen shkeljet në trafik sikurse tejkalimi i shpejtësisë, skadimi i afatit të regjistrimit, tejkalimi në vende të ndaluara, mosrespektimi i semaforit, mosvendosja e rripit, përdorimi i telefonit mobil e kundërvajtje të tjera.
Pas verifikimit të pronarit të automjetit, policia e regjistron dhe e printon dëshminë e kundërvatjes. Të dhënat futen në sistem, e më pas gjoba vendoset në zarf e dorëzohet në shërbimin postar, për t’iu dërguar më pas pronarit të automjetit.
Qytetarët mund të paraqesin ankesë për gjobën e pranuar. Atyre po ashtu iu mundësohet që të paguajnë gjobën për kundërvajtje në çdo zyre postare të Postës së Kosovës./PrizrenPress.com
