Sot, banorët e fshatit Landovicë të Prizrenit, organizuan një aksion pastrimi që rezultoi me largimin e një sasie të madhe mbeturinash nga qendra e fshatit. Aksioni u përshëndet nga kryetari i fshatit, Faik Berisha, i cili bëri apel për ruajtjen e mjedisit dhe njoftoi se iniciativat e tilla do të vazhdojnë edhe në javët në vijim.
“Pastrimi i fshatit nuk është vetëm detyrë institucionale, por mbi të gjitha, përgjegjësi qytetare. Duhet të krijojmë një kulturë të re për kujdes ndaj mjedisit”, u shpreh ai.
Berisha gjithashtu bëri të ditur se do të organizohen aksione të ngjashme çdo muaj, me qëllim që fshati të ruajë pastërtinë gjatë gjithë vitit.
Ai ftoi edhe institucionet komunale që të ofrojnë më shumë mbështetje për fshatra si Landovica, duke vënë në dispozicion kontejnerë dhe logjistikë për grumbullimin e mbeturinave.
Banorët u shprehën të kënaqur me rezultatin e aksionit dhe nënvizuan nevojën për ndërgjegjësim të vazhdueshëm, veçanërisht tek të rinjtë./tv prizreni/
