Dega e LDK-së në Prizren ka vlerësuar aktakuzën e ngritur nga Prokuroria Themelore e Prizrenit për veprat penale të keqpërdorimit të detyrës zyrtare dhe mashtrimit në prokurimin publik.
Ky subjekt politik përmes një reagimi publik ka dënuar abuzimin me pozitën zyrtare dhe shpërdorimin e parasë publike.
“LDK në Prizren mirëpret lajmin për veprimet konkrete nga Prokuroria Themelore në Prizren ndaj disa zyrtarëve publikë dhe një personi përgjegjës të një kompanie, lidhur me vepra të dyshuara korruptive. LDK në Prizren dënon ashpër çdo formë të abuzimit me pozitën zyrtare, shpërdorimin e parasë publike dhe çdo veprim që cenon besimin e qytetarëve në institucionet tona”, thuhet në reagim.
Aktakuzë ndaj zyrtarëve të Komunës së Prizrenit, dyshohet se mashtruan në një tender
Në të njëjtën kohë ka kërkuar veprime edhe për rastet e tjera.
“Ne ritheksojmë qëndrimin tonë të palëkundur për luftë të pakompromis kundër korrupsionit dhe për forcimin e sundimit të ligjit, transparencës dhe llogaridhënies. Kërkojmë nga organet e drejtësisë që të veprojnë me profesionalizëm dhe pa ndikime politike, edhe në rastet tjera, për të cilat LDK ka bërë edhe denoncime konkrete”, thuhet në reagim.
