Skuadra e Bashkimit U18 është shpallur kampione e Kosovës për edicionin 2024/25, duke e përmbyllur sezonin me dy trofetë më të rëndësishëm në basketbollin për të rinj: Kupën dhe Kampionatin e Kosovës, raporton PrizrenPress.
Në finalen vendimtare të kampionatit, Bashkimi mposhti Kerasan Prishtinën në serinë finale me rezultat 2-1, duke dëshmuar cilësi, karakter dhe përgatitje të lartë teknike. Ky sukses vjen pas fitores së mëhershme në Kupën e Kosovës, duke e bërë sezonin 2024/25 më të suksesshmin në historinë e ekipit të të rinjve.
Ekipi u drejtua nga trajneri Elbesar Geshtenja dhe ndihmësi Adell Imeri, me përkrahjen e stafit teknik Besim Bytyqi dhe Fis Jashari. Profesionalizmi i stafit dhe përkushtimi i lojtarëve u reflektuan në çdo ndeshje, ku skuadra tregoi pjekuri dhe kohezion të fortë./PrizrenPress.com
