Udhëkryqi që lidh rrugët “Ekrem Rexha” dhe “Brigada 128” në Prizren është shndërruar në një pikë tensioni të përditshëm për qarkullimin rrugor.
Bllokimet e shpeshta dhe rrëmuja në trafik po e bëjnë këtë nyje rrugore gjithnjë e më të pakalueshme, ndërsa banorët e zonës po kërkojnë me ngulm ndërtimin e një rrethrrotullimi.
Sipas tyre, kjo do të ishte një zgjidhje e domosdoshme për rritjen e sigurisë dhe lehtësimin e lëvizjes në këtë segment të rënduar të qytetit.
Kliko videon:https://www.facebook.com/PrizrenPress/videos/542867348898547
Kërkesa për ndërtimin e rrethrrotullimit është ngritur edhe në institucionet lokale.
Asamblisti i Nismës Socialdemokrate, Shukri Çuni, ka ngritur këtë çështje në seancën e fundit të Kuvendit Komunal të Prizrenit.
“Kam paraqitur një kërkesë për ndërtimin e një rrethrrotullimi në udhëkryqin që lidh këto dy rrugë, mirëpo deri më tani nuk është ndërmarrë asnjë veprim konkret. E ritheksoj se një rrethrrotullim është i domosdoshëm për të përmirësuar qarkullimin dhe sigurinë në këtë zonë”, tha Çuni.
Kryetari i Komunës së Prizrenit, Shaqir Totaj, tha se institucionet komunale janë të gatshme të shqyrtojnë kërkesën nëse ajo mbështetet nga komuniteti lokal.
“Nëse banorët e lagjes e shohin të nevojshme ndërtimin e një rrethrrotullimi, atëherë ekspertët tanë do të dalin në terren për të bërë vlerësimin teknik. Nëse konstatohet se është e domosdoshme, do të ndërhyjmë”, tha Totaj./PrizrenPress.com/
Marketing
