Paris Saint-Germain ka realizuar një nga sezonet më të mëdha në historinë e klubit dhe futbollit evropian, duke fituar për herë të parë në histori Ligën e Kampionëve dhe duke e përmbyllur sezonin me tripletën: Ligue 1, Kupa e Francës dhe Champions League.
Në finalen e zhvilluar ndaj Interit, parizienët dominuan totalisht, duke fituar me rezultatin spektakolar 5-0, një mesazh i qartë për supremacinë e tyre në këtë sezon.
Ndeshja nisi furishëm për skuadrën e Luis Enrique, ku vetëm pas 12 minutash, Achraf Hakimi realizoi golin e parë, pas një asisti të talentit Desire Doué. Vetëm tetë minuta më vonë, Doué realizoi golin e dytë për PSG-në, kësaj here pas një pasimi të saktë nga Ousmane Dembélé.
Me rezultatin 2-0 përfundoi pjesa e parë, ndërsa Interi nuk arriti të krijonte asnjë rrezik të vërtetë në portën e Donnarumma-s.
Në pjesën e dytë, dominimi francez vazhdoi. Doué shënoi sërish në minutën e 63-të, duke e bërë rezultatin 3-0, ndërsa Khvicha Kvaratskhelia e çoi atë në 4-0 në minutën e 73-të pas një tjetër asisti nga Dembélé.
Në minutën e 87-të, talenti i ri Senny Mayulu e vulosi triumfin historik me golin e pestë.
Me këtë fitore, Luis Enrique bëhet trajneri i parë në historinë e PSG-së që fiton tripletën, duke treguar suksesin e projektit që ka ndërtuar dhe forcën e jashtëzakonshme të kësaj skuadre./PrizrenPress.com
Marketing
Kliko videon: https://www.facebook.com/PrizrenPress/videos/1684680412412465
