Sot, 57 fermerë nga Prizreni kanë përfituar lopë qumështore si pjesë e projektit të Drejtorisë Komunale të Bujqësisë, “Furnizimi me Mëshqerra Gravide”, që ka për qëllim rritjen e prodhimit të qumështit dhe mbështetje të blegtorisë në rajon.
Në një ceremoni të organizuar të enjten, fermerët morën lopët, të cilat janë sjellë kryesisht nga Çekia, si pjesë e një investimi që synon përmirësimin e kushteve të punës dhe rritjen e efikasitetit të fermave të blegtorisë.
Në këtë ngjarje, ishte i pranishëm edhe nënkryetari i komunës, Kujtim Gashi, i cili theksoi angazhimin e administratës lokale për mbështetje të vazhdueshme për fermerët dhe zhvillimin e sektorit të blegtorisë.
“Komuna e Prizrenit po i jep vëmendje të shtuar sektorit të bujqësisë, duke ofruar mbështetje financiare dhe teknike për blegtorët, që do t’i ndihmojë ata të përmirësojnë produktivitetin dhe kushte më të mira për prodhimin e qumështit”, tha Gashi.
Drejtori i Drejtorisë së Bujqësisë, Bexhat Bytyçi, theksoi se përfitues të këtij projekti janë 57 fermerë që tashmë kanë grupe të vogla lope (nga 5-10 krerë), dhe që janë të angazhuar seriozisht në veprimtarinë e blegtorisë. Ai shtoi se kostoja totale e projektit është 141,360 euro, ku komuna ka kontribuar me 85% të shumës, ndërsa pjesa tjetër është siguruar nga vetë fermerët.
“Ne kemi siguruar lopë të cilësisë së lartë, të cilat do të mundësojnë rritje të prodhimit dhe të ardhura më të larta për fermerët tanë. Ky investim është një hap i rëndësishëm drejt fuqizimit të këtij sektori dhe krijimit të mundësive më të mira për fermerët”, tha Bytyçi.
Dy nga fermerët përfitues, Fehim Krasniqi nga Nasheci dhe Rraman Dervishaj nga Billusha, falënderuan organet komunale për mbështetje dhe shprehën nevojën për projekte të tilla, të cilat janë jetike për zhvillimin e fermave të tyre. Ata theksuan se investimet në blegtori ndihmojnë jo vetëm për rritjen e prodhimit, por edhe për përmirësimin e kushteve të jetesës dhe përforcimin e komunitetit bujqësor në rajon./TV Prizreni
Marketing
Përjetoni pushime të paharruar dhe dasma magjike në Hotel “Albes Residence”
Kompleksi ‘Newco Elan’ ofron banesa të ëndrrave tuaja në zemër të Prizrenit
