Kuvendarët e Lëvizjes Vetëvendosjes, kanë kritikuar kryesuesen , Antigona Bytyçi, për mënyrën e udhëheqjes së seancës së Kuvendit të Prizrenit.
“Kryesuesja e Kuvendit Komunal Antigona Bytyçi, po dështon në ruajtjen e integritetit të Kuvendit, duke e degraduar atë në mashë të grupeve të interesit”, thuhet në reagimin e Vetëvendosjes në Prizren.
Kryesuesja e Kuvendit, Bytyçi, nuk ka futur në rend të ditës kërkesën e kuvendarit të pavarur, Bujar Hasani për zgjedhjen e anëtarit të ri të Komisionit të Aksionarëve në Stacionin e Autobusëve, pozitë të cilën e ka mbajtur drejtori i sapozgjedhur i Shëndetësisë, Simir Krasniqi.
Kjo kërkesë u mbështet edhe nga disa anëtarët e tjerë të Kuvendit.
Ndërkaq, Bytyçi tha se këtë çështje e ka dërguar për interpretim ligjor në MAPL.
“Refuzimi i Kryesueses për t’i futur në votim propozimet e kuvendarëve për rend të ditës vetëm pse nuk i pëlqen Shaqir Totajt, është shkelje e Rregullores së Punës së Kuvendit dhe ligjeve në fuqi për të drejtat dhe detyrat e anëtarëve të Kuvendit. Kryesuesja e Kuvendit Komunal Antigona Bytyçi po dështon në ruajtjen e integritetit të Kuvendit duke e degraduar atë në mashë të grupeve të interesit. Kjo për pasojë sjelli edhe dështimin e mbajtjes së mbledhjes së sotme”, vlerëson Vetëvendosje.
“Pushteti komunal i Prizrenit nuk po i përfaqëson interesat e qytetarëve. Mospërfillja e procedurave dhe ligjeve gjatë procesit të vendimmarrjes është tregues për injorancën dhe dashakeqësinë e një pushteti të dobët, të cilit po i vjen fundi gradualisht”./PrizrenPress.com/