Ish-asistenti personal i ish-zëvendësministrit të Arsimit, Nehat Mustafa, është arrestuar të hënën pasi është zënë në flagrancë duke falsifikuar diploma universitare.
I dyshuari Kushtrim Metushi (25) nga Komuna e Ferizajt, i cili deri në fund të majit të vitit që shkoi kishte punuar në Ministrinë e Arsimit, të Shkencës dhe të Teknologjisë (MASHT), e që nga tetori kishte aderuar nga PDK-ja në Forumin Rinor të LDK-së në Ferizaj, thuhet të jetë marrë me këtë aktivitet ilegal “vetëm për kureshtje”.
Të paktën kështu ka deklaruar ai para policisë gjatë intervistimit, shkruan sot Koha Ditore.
Këtë e ka bërë të ditur avokati i tij mbrojtës, Jeton Berisha, sipas të cilit Metushi si një student i Informatikës ka vendosur ta “sfidojë veten” për të parë nëse ja del të realizojë me ndihmën e kompjuterit diploma universitare.
Një “eksperiment” të tillë përveçse ja kishte dedikuar vetes e kishte bërë edhe për të tjerët.