Kur New Order shkuan në turne verën e kaluar, luajtën një këngë të re. Përgjatë koncerteve që supozohej të ishin të fundit, punuan në të dhe e titulluan “Plastic”. Tash, kjo këngë do të jetë pjesë e albumit të tyre të ri, i dhjeti me radhë.“Pritjet ishin të mira dhe ne u kënaqëm. Dukej logjike për ta bërë”, thotë për Rolling Stone vokalisti dhe kitaristi 59 vjeçar, Bernard Sumner.
Anëtarët e New Order zbulojnë se tashmë dy këngë janë kryer, “Plastic” dhe “Restless”, ndërsa albumi pritet të jetë gati dhe të publikohet dikur kah vjeshta e këtij viti.
Ky album do të jetë i pari i tyre qyshkur basisti Peter Hook la grupin në vitin 2007, ndërsa sërish do të bashkohet anëtari tjetër Gillian Gilbert.
“Është shi dhe ftohtë jashtë. Është errët. Kohë e mirë për të shkruar”.
Kështu e ka komentuar frontmeni Bernard Sumner procesin e shkrimit të albumit të tyre të ri, i pari që nga ai i vitit 2005 “Waiting For The Siren’s Call” dhe tjetri i publikuar më 2013 “Lost Sirens” (i cili është shkruar po ashtu në vitin 2005).
Pas kësaj fjalie të Sumner, daullexhiu Stephen Morris ka shtuar: “Kjo e shpjegon goxha përmbajtjen e bendit, apo jo? Bernard ka dëshirë të jetë vetëm kur shkruan, vetëm me shishen e verës së tij”.
Sumner ka pohuar se konfigurimi i ri, i ka bërë ata më fleksibilë.
“Po bëhemi këngëshkrues në vend të instrumentalistë”. / Politiko.net