Lideri i Lëvizjes Vetëvendosje!, Albin Kurti, ka fajësuar Qeverinë e Kosovës për situatën e jashtëzakonshme që ndodhi të martën gjatë protestës e cila eskaloi në dhunë.
“Po të ishte shkarkuar Aleksandër Jabllanoviq dhe po të ishte kthyer ligji për Trepçën sot nuk do të kishte protesta. Pra përgjegjësi i takon krejtësisht Qeverisë e cila po punon me konceptin e Sheshelit dhe Millosheviqit”, ka thënë Kurti në një konferencë të jashtëzakonshme për media të martën.
Ai po ashtu ka bërë fajtor kryeministrin Isa Mustafa dhe zëvendësin e tij Hashim Thaçin të cilët sipas tij, ndërsyen policët ndaj protestuesve.
Kurti ka thënë se derisa nuk shkarkohet Jabllanoviqi dhe ligji për “Trepçë”-n të rikthehet në Kuvend do të ketë protesta. Sipas tij, për këto protesta do të bëhet e ditur ditëve në vijim.