Departamenti për Krime të Rënda në Gjykatën Themelore të Prizrenit, vendosi që ndaj të pandehurit U. Sh. nga fshati Jashkovë, Komuna e Prizrenit, të caktoj masën e paraburgimit, për shkak të dyshimit të bazuar se ka kryer veprat penale të “vrasjes” dhe “mbajtja në pronësi, kontroll ose posedim të paautorizuar të armëve”.
“I pandehurit do të mbahet në paraburgim në kohëzgjatje prej 1(një) muaji, i cili do të llogaritet, prej datës 31.01.2015 dhe do të zgjasë deri më datën 02.03.2015”.tha zëdhënësja e Gjykatës në Prizren, Afërdita Kicaj.
Mbajtjen në paraburgim të pandehurit, e kërkoi Prokurori i Shtetit.
I pandehuri dyshohet për shkelje të Kodit Penal, se më datë 31 janar 2015, gjatë orëve të natës në shtëpinë e tij familjare dyshohet se e privoi nga jeta të ndjerin Xh. Berisha i cili ishte bashkëfshatar i tij.
Pas manipulimit me armën të cilën e ka pasur në dorë i pandehuri, e njëjta ka shkrepur në drejtim të ndjerit, i cili nga goditja bie në dysheme të dhomës, ku nga pasojat e marra ndërron jetë.