Anëtari i Kryesisë së LDK-së, Lutfi Haziri, u ka bërë thirrje Skënder Hysenit dhe Bekim Çollakut që të punojnë nga 24 orë në ditë për liberalizimin e vizave.
Haziri në profilin e tij në “Facebook”, ka shkruar se Hyseni dhe Çollaku e kanë për detyrë të menaxhojnë krizën e humbjes së shpresës së qytetarëve dhe ta rikthejnë në një qëllim arritjen e datës për liberalizimin e vizave.
“Kryeministri i ri i Republikës, pas vendimit për faljen e borxheve të qytetarëve për periudhën para idenpedente (vlen të theksohet se është pjesë e programit dhe vendim i qëlluar), tash duhet sjell vendimin e dytë: Skënder Hyseni e Bekim Çollaku të detyrohen tash e tutje të punojnë 7 ditë e 24 orë në Prishtinë për të menaxhuar krizën e ‘humbjes së shpresës’ së qytetarëve dhe ta rikthejnë në një qëllim që të arrihet marrja e datës për liberalizimin e vizave. Na e kanë borxh të gjithë neve, e mbi të gjitha qytetarëve të Kosovës. Këta dy ministra nuk kanë detyra tjera pos marrjes së kësaj ‘farë date’ që na çmendi që gjashtë vjet! E kemi për obligim të shpjegojmë detyrimet, obligimet, kufizimet dhe të drejtat e udhëtimit, por ama si mundësi që do ta ketë secili qytetar i Kosovës që merr udhën për Evropë…! Ama veç ministrat po sillen ashtu sepse qytetarët e kanë udhën e vjetër prapë përmes Tisës, Suboticës e me një ndalje në Beograd. Edhe pas 70-vjetësh e njëjta histori. Ka ardhur koha që të ndalet. Ju mund ta ndalni nëse këta dy ministra e kanë përnjëmend dhe punojnë me disiplinë në agjendën tuaj!”, ka shkruar Haziri.