Disa objekte të rëndësishme kulturo-historike janë riparuar vitin e kaluar në Prizren, ndërsa kjo ka mundësuar edhe përmirësimin e gjendjes fizike të monumenteve, me të cilat edhe identifikohet qyteti jugor i vendit.
Në realizimin e tyre përveç Ministrisë për Kulturë, Rini e Sport (MKRS), kanë ndihmuar edhe donatorët, ndërsa merita ka edhe Qendra Rajonale për Trashëgimi Kulturore (QRTK) në Prizren që ushtron përgjegjësit dhe në kuadër të MKRS-së.
Samir Hoxha, drejtor i QRTK-së, ka thënë për “Zërin” gjatë vitit që shkoi bazuar në Planin Vjetor të Punës është bërë kontrollimi i 84 projekt propozimeve të qytetarëve dhe institucioneve të tjera për punime investive në Zonën e Mbrojtur dhe në afërsi të monumenteve, pastaj analizimi i tyre si dhe përgatitja e dokumentacionit për komision në MKRS.
Në këtë kontekst, ai tha se është bërë përgatitja, kontrollimi dhe plotësimi i dokumentacionit për propozim listën e trashëgimisë kulturore për mbrojtje të përkohshme në qytetin e Prizrenit dhe pesë komunat, që janë pjesë e rajonit të Prizrenit, sipas listës dhe udhëzimeve të MKRS-së.
“Nga të hyrat vetanake është investuar në rregullimin e çatisë dhe fasadës së lokalit që ende ushtron zejen e farkëtarisë dhe është bërë mbikëqyrja e punëve për ndërrimin e kulmit dhe restaurimin e fasadës të lokalit e farkëtarit në shatërvan, derisa është bërë edhe udhëheqja e punëve në restaurimin e objektit, në të cilin ushtrohet zeje e briskpunuesve, në pronësi të familjes Shinik në Prizren, punimet e të cilit i zbatoi IRD-ja, nën mbështetjen financiare të Zyrës amerikane në projektin “Restaurimi i objekteve kulturore”, ka thënë Hoxha.
Po ashtu është restauruar banja -hamamxhiku në shtëpinë e familjes së Dukagjinëve, derisa janë në vazhdim punimet për restaurimin e shtëpisë së Katarina Josipit në fshatin Zym të Hasit, projekt ky nga investimet kapitale të MKRS-së.
Hoxhaj ka thënë se janë realizuar edhe projekte për intervenime emergjente të financuara nga MKRS-ja, ku është bërë mbikëqyrja e punimeve për katër objekte të trashëgimisë kulturore, që kanë të bëjnë me objekte banimi, si shtëpia e familjes Rekathati, ajo e familjes Paçarizi, shtëpia e familjes Burgjia, si dhe shtëpia e familjes Kantarxhiu.
Në kontekstin e mirëmbajtjes fizike të objekteve të rëndësishme kulturo-historike në Prizren, nga donacioni i UNESCO-s janë kryer punimet në Katedralen Katolike, ndërsa punimet janë mbikëqyrur nga ekspertët e QRTK-së.
Gjithashtu nga donacioni i UNESCO-s janë kryer punimet në restaurimin dhe rehabilitimin e hamamit të “Gazi Mehmed Pashës” në Prizren. Në fazën e parë ka qenë e paraparë të kryhen punimet e çatisë. Sipas zyrtarëve janë dhënë rreth 300 mijë dollarë nga fondet e UNESCO-s në Konferencën që është mbajtur në Turqi.
Ndërkaq, një numër projekt propozimesh për masat preventive janë paraparë si ndërhyrje emergjente dhe i janë përcjellë për vitin 2015 MKRS-së. Në listën e këtyre objekteve janë xhamia e “Myderiz Ali Efendisë”, shtëpia e familjes Ereni, pastaj shtëpia e familjes Okqaboll, kompleksi i teqesë “Sinani”, kompleksi i tyrbeve të Karabashit, ndërtesa e trafostacionit të vjetër, shtëpia e familjes Myftiu, ajo e Muhamed Shukriut, shtëpia e familjes Drini, ajo e familjes Ukallo, shtëpia e familjes Thaçi, shtëpia e familjes Lezi, ajo e familjes Celina, shtëpia dhe hambari i familjes Hadro, pastaj shtëpia e familjes Godeni, shtëpia e familjes Skenderi, shtëpia e familjes Koçbashliu, ajo e familjes Hajdari.
Pos tyre në projekt propozim janë edhe shtëpia e familjes Shporta, hani-nallban i familjes Kovaçi, xhamia e fshatit Zatriq (Rahovec), Mulliri i Rexhep Shatrit në fshatin Kushnin (Prizren), Kulla e Tahir Reshitit në fshatin Kojush të Hasit, Kulla e Jonuz Hasan Tafollit në fshatin Qadrak të Therandës, Shtëpia e Idris Caro-së në fshatin Brod të Dragashit, si dhe Hambari i familja Reshitaj në fshatin Bubël të Malishevës
Sipas Hoxhës, realizimi i këtyre projekteve do të bëhet varësisht nga buxheti, i cili do të jetë në dispozicion nga ana e MKRS-së, për implementimin e tyre. /Zëri/