Do të shembet i gjithë procesi i përzgjedhjes dhe nominimit të kryeprokurorit të Shtetit, nëse për të Këshilli Prokurorial nuk e informon “në hollësi” Gjykatën Kushtetuese.
Ky kërcënim i ka mbërritur të hënën forumit më të lartë vendimmarrës të organit të akuzës, nëpërmjet një letre të nënshkruar nga kryetari i Kushtetueses, Enver Hasani.
Gjatë javës së kaluar dy institucionet ishin përplasur me Këshillin Prokurorial që insiston se informatat relevante për procesin e parë, të kontestuar të zgjedhjes së kryeprokurorit tashmë ia ka dërguar Gjykatës Kushtetuese, dhe me këtë të dytën që vazhdon të kërkojë informatat edhe për procesin e dytë, ndaj të cilit askush nuk është ankuar. Përplasja ka vazhduar bllokimin e zgjedhjes së kryeprokurorit të shtetit, që vazhdon prej verës së shkuar.
Letra e dërguar të hënën nga Kushtetuesja përmban tone kërcënuese ndaj Këshillit Prokurorial, i cili thuhet se do të mblidhet të martën për të shqyrtuar situatën e re të krijuar..