Gjykata Themelore në Prizren, mbështetur nga Misioni i OSBE-së në Kosovë, ka mbajtur një tryezë të rrumbullakët me gjyqtarë, prokurorë dhe avokatë nga rajoni i Prizrenit.
Zëdhënësja e Gjykatës, Afërdita Kicaj tha se ky takim është takimi i parë në vargun e tri tryezave të rrumbullakëta që kanë për qëllim rritjen e pajtueshmërisë së Gjykatës Themelore me praktikën e Gjykatës Evropiane për të Drejtat e Njeriut (GJEDNJ).
“Në takim morën pjesë 35 gjyqtarë, prokurorë dhe avokatë. Gjatë diskutimit u theksua që të pranishmit kanë njohuri rreth Konventës Evropiane për të Drejta të Njeriut si dhe rolin e praktikës gjyqësore të GJEDNJ-së, ndonëse rrallëherë e aplikojnë apo i referohen të njëjtës gjatë procedurave, në parashtresa, vendime dhe aktgjykime për shkak të faktorëve që u identifikuan gjatë tryezës së rrumbullakët: mungesa e literaturës në gjuhët zyrtare, koha e pamjaftueshme, numri i madh i lëndëve”.
“Me qëllim të aftësimit të pjesëmarrësve për të përdorur më mirë bazën e të dhënave të GJEDNJ-së (HUDOC), aktiviteti përfshiu edhe një prezantim praktik mbi mënyrën e të kërkuarit të aktgjykimeve në gjuhët lokale”. /PrizrenPress.com