Me regji të Agon Myftarit, komedia e errët “Vigjilje” do të shfaqet për adhuruesit e teatrit në Prizren. Kjo shfaqje është e para për këtë vit në Teatrin e Prizrenit.
Puna për realizimin e saj ka filluar qe disa javë dhe provat e para janë mbajtur në një sallë të vogël në teatër, pasi skena ka qenë e zënë me disa projekte të tjera. Megjithatë, realizimi i kësaj shfaqje ka nisur mbarë dhe puna ekipore është duke shkuar mirë, bënë të ditur emisioni Express.
Shfaqja e sjellë historinë e një vejushe e cila para dy vjetëve e humb burrin, një zjarrfikës, i cili vdes në detyrë në përpjekje për ta shpëtuar një bebe nga një ndërtesë që po digjej. Në vend se të mbajë zi, ajo e mban shpirtin e burrit të saj në një kuti dhe shpesh e nxjerr atë për të bërë biseda dhe përqafime të kohëpaskohshme. Pas dy vjetësh ajo cakton takim me një vardisës, një shok të burrit të saj.
Më e veçanta në tërë këtë projekt është se punën e tij me këtë shfaqje, regjisori Agon Myftari ia dedikon babait të tij të ndjerë, aktorit të mirënjohur të filmit dhe teatrit Hazir Myftarit, i cili ndërroi jetë vitin e kaluar.
Arta Selimi, Ernest Malazogu, Alban Morina, Alban Krasniqi, Xhevdet Doda, Liridona Shehu, Rifat Smani janë aktorët e kësaj shfaqjeje, puna e të cilëve kërkon goxha energji këtë herë. Ata do të paraqiten me nga dy role te ndryshme.
Premiera e shfaqjes “Vigjilje” pritet të dalë në fillim të muajit maj.