Në sallën “Motra Tone” të Galerisë Kombëtare të Arteve në Tiranë po qëndron e hapur një ekspozitë e pazakonshme. “Edukimi përmes artit” është një paraqitje e veprave artistike dhe artizanale e të burgosurve në Shqipëri, organizuar nga Drejtoria e Përgjithshme e Burgjeve.
Sipas mediave shqiptare, kjo është hera e parë që personat me liri të kufizuar ekspozojnë punimet e tyre. Zv.ministri i Drejtësisë, Arben Isaraj, ka thënë se kjo ekspozitë paraqet ndryshime pozitive në qasjen ndaj burgjeve.
Përpos punonjësve social, organizatave jo-qeveritare dhe familjarëve, në ekspozitë ishin të pranishëm edhe disa të burgosur, të cilët u shpërblyen me çmime për punimet e tyre. Sipas “Shqiptarja”, çmimi i parë iu dha Vesel Hoxhës, nga IEVP Elbasan, me pikturën “Natyrë e qetë”, çmimi i dytë iu dha Albana Lazajt, e IEVP “Ali Demi”, për punimet artizanale në grep, qëndisje dhe objekte me rruaza, ndërsa çmimi i tretë iu dha Niku Beqirit, i IEVP Peqin, për pikturën “Natë me hënë”.