Një grup nxënës të shkollës së mesme nga Wetzikoni i Cyrihut të Zvicrës janë duke qëndruar për një vizitë disa ditore në Prizren. Ata janë mysafirë të ftuar nga gjimnazi i Prizrenit “Gjon Buzuku”.
Gjatë ditës së sotme nxënësit zviceranë kanë vizituar edhe komunën e Prizrenit, me ç`rast janë pritur në një takim nga kryetari i Komunës Ramadan Muja.
Pas takimit më mysafirët nga Zvicra, Ramadan Muja ka thënë se kjo vizitë mundëson vendosjen e raporteve të bashkëpunimit.
“Ne jemi të interesuar që të përkushtohemi më tej në avancimin e arsimit për të rinjtë tanë, përmes shkëmbimit të përvojave të nxënësve tanë me ata zviceranë”, ka deklaruar ai për televizionin e Prizrenit.
Në anën tjetër, drejtori i shkollës zvicerane Martin Zimmerman është ndarë i befasuar nga mikpritja e drejtuesve dhe nxënësve të gjimnazit si dhe nga krerët e komunës së Prizrenit.
“Me bashkëpunimin e ndërsjellë mund të përfitojmë të gjithë”, ka thënë ai.
Gjatë kësaj vizite, është diskutuar edhe për mundësinë e binjakëzimit të gjimnazit “Gjon Buzuku” me gjimnazin zviceran që gjendet në Wetzikon të kanton Cyrihut.