Në raport me mediat, Qeveria e Isa Mustafës ngjason me atë të kaluarën të udhëhequr nga Hashim Thaçi. Me një dallim të vogël nga Thaçi, Mustafa ka emëruar një zëdhënës, por Arban Abrashi – që është edhe ministër i Punës dhe Mirëqenies Sociale – nuk është në dispozicion të gazetarëve.
Shkëlqim Hysenaj, anëtar i bordit të Asociacionit të Gazetarëve të Kosovës (AGK), ka thënë se Mustafa po mundohet që ta kopjojë Thaçin, duke komunikuar me publikun vetëm nëpërmjet rrjeteve sociale.
“Strategjia të cilën po e përdor kryeministri Mustafa për të komunikuar me media, është një strategji e kopjuar nga ish-kryeministri Thaçi “, ka thënë Hysenaj, duke shtuar se AGK është njoftuar për pamundësinë e gazetarëve që të komunikojnë me ministrin Abrashi.
Me Abrashin e ka pasur të pamundur të komunikojë edhe TV Dukagjini. Ndaj, AKG rekomandojnë që kryeministri Mustafa ta caktojë një zëdhënës i cili merret vetëm me media.
“Ka çdo ditë ankesa nga gazetarët të cilët thonë se pavarësisht që dërgojnë disa herë pyetje tek zëdhënësi i Qeverisë, ata nuk marrin përgjigje. Qeveria duhet të mendojë seriozisht që të jetë më e hapur me gazetarët, në mënyrë që ta bëjë transparente punën e vet, e jo që mediat të jenë të detyruara që informacionet zyrtare t’i marrin përmes burimeve të tjera brenda kabinetit qeveritar”, thekson Hysenaj.
Mungesa e një zëdhënësi dhe e komunikimit me media nuk qëndron vetëm tek kabineti i kryeministrit. Mungesë të tilla ka edhe tek ministritë.
“Shumë Ministri të kabinetit qeveritar – konkretisht ministri për Punë të Brendshme, ministri i FSK-së, ministri i Infrastrukturës, dhe disa ministra të tjerë – janë të paqasshëm për media”, ka shtuar Hysenaj.
Asociacioni i Gazetarëve të Kosovës pret që Qeveria të reflektojë dhe të marrë parasysh rekomandimet e shoqatës së gazetarëve. /RTV Dukagjini/