Koalicioni qeverisës, PDK- LDK, i drejtuar nga Isa Mustafa e Hashim Thaçi, do të provoj që edhe njëherë ta vë në rend të ditës, në seancën e Kuvendit të Kosovës, amendamentin kushtetues, i cili do t’i hapte rrugë themelimit të Gjykatës Speciale. Kështu i kanë thënë burime ndërkombëtare Gazetës Blic.
Sipas këtyre burimeve, Hashim Thaçi është zotuar tek ndërkombëtarët se do të bëjë përpjekje maksimale që t’i bind deputetët e tij që ta votojnë themelimin e Gjykatës Speciale.
“Sipas të gjitha gjasave të enjten, edhe njëherë do të jetë para deputetëve amendamenti kushtetues, i cili do t’i hapte rrugë themelimit të Gjykatës Speciale”, tha ky burim.
Ndërkohë, Gazeta Blic ka raportuar se sot është mbledhur Grupi Parlamentar i PDK-së, ku temë qendrore ka qenë pikërisht votimi i Gjykatës Speciale.
Sipas burimeve të Gazetës Blic, në këtë mbledhje ende nuk është arritur pajtueshmëria për votimin e amendamentit kushtetues nga ana e PDK-së.
Gjatë ditës së djeshme, njëri nga deputetët që e ka votuar kundër Gjykatën Speciale herën e parë, Fadil Demaku ka thënë se sërish do të votoj kundër.
“Nuk kam ndryshuar qëndrim. Është çështje e përfunduar, do të votoj kundër”, i ka thënë ai Gazetës Blic.
Edhe deputeti tjetër, Bekim Haxhiu- Kamishi dje në një intervistë që e ka dhënë për mediet ka qenë i prerë në qëndrimet e tij, se nuk do ta votoj Gjykatën Speciale.
Pos opozitës që ishte kundër, ishin edhe 13 deputetë të PDK-së ata të cilët bën që të dështoj kalimi në Kuvend i amendamentit kushtetues, që do t’i hapte rrugë themelimit të Gjykatës Speciale.
Partitë opozitare, në vazhdimësi kanë bërë thirrje që të mos të ndodh riprocedimi i këtij amendamenti kushtetues, për faktin se nëse do të ndodhte kjo, atëherë përfundimisht në Kosovë do të marrë fund demokracia./ Gazeta Blic