Muhamet Hajrullahu
Testi i Maturës Shtetërore këtë vit ka shënuar një avancim në krahasim me atë të vitit të kaluar, por nevojiten përmirësime të mëtejme në aspektin administrativ dhe të mbikqyrjes së procesit nga ana e Ministrisë së Arsimit, Shkencës dhe Teknologjisë (MAShT).
KALLXO.com ka monitoruar dy afatet e Testit të Maturës Shtetërore 2015 sikurse edhe vitin e kaluar.
Në afatin e parë në qershor, Testit të Maturës këtë vit i janë nënshtruar rreth 33 mijë nxënës në 250 qendra të testimit ndërsa në afatin e dytë testit i janë nënshtruar mbi 16 mijë maturantë.
Ekipet tona ishin mirëpritur në shumicën e Qendrave të Testimit dhe stafi administrues kryesisht ka qenë bashkëpunues. Përjashtim në afatin e gushtit bëjnë rastet e shkollës “Bahri Haxha” në Vushtrri , “Xhelal Hajda- Toni” në Rahovec, ku përgjegjësit kanë refuzuar hyrjen apo ia kanë pamundësuar monitorimin ekipeve të KALLXO.com. Pengesa të ngjashme janë paraqitur edhe në shkollën “Selajdin Mullabazi Mici”, gjithashtu në Rahovec, ku sërish ekipi i monitoruesve është penguar ta kryejë punën sipas marrëveshjes.
Sipas gjetjeve nga monitorimi i KALLXO.com, është vërejtur një mobilizim dhe seriozitet më i lartë në insistimin për të siguruar mbarëvajtje të administrimit të Testit të Maturës.
Sidoqoftë, edhe këtë vit, në të dyja afatet janë shënuar lëshime në aspektin administrativ si dhe në mbikëqyrjen e Testit të Maturës.
Kopjimi dhe shpërndarja online e Testit të Maturës në rrjetet sociale mbeten edhe mëtej një nga problemet më të mëdha në këtë proces.
Në këtë drejtim nevojitet një komunikim më i rregullt ndërmjet MAShT dhe Policisë së Kosovës për ta parandaluar dhe luftuar këtë fenomen që po përsëritet.
Mbetet sfidë të tejkalohen situatat, si mungesat ose vonesat e administratorëve, problemet dhe mospërputhja e listave me emrat e nxënësve të cilët kanë të drejtë t’i nënshtrohen Testit të Maturës, e sidomos qartësimi, informimi dhe uniformimi i rregullave të testimit.
Ekipet tona monitoruese, sikurse edhe vitin e kaluar, kanë vërejtur laramani të aplikimit të rregullave të përcaktuara nga MAShT-i. Jo vetëm në mes të qendrave të ndryshme të testimit, por edhe brenda një qendre testuese është interpretuar dhe zbatuar në mënyra të ndryshme procedura e identifikimit të nxënësve, mbajtjes së pajisjeve elektronike (telefonave mobil, etj.), vendosjes së çantave, lejimi i papenguar i qasjes në internet, etj.
Si probleme kryesore të identifukura janë: vonesat e fillimit dhe mbylljes së testit; administrimi i Testit të Maturës; qasje në Internet në Qendra të Testimit; përdorimi i telefonave celularë gjatë testit; shpërndarja e paautorizuar e pyetjeve dhe përgjigjeve të Testit si dhe rastet kur janë penguar në punë ekipet e KALLXO.com
Ekipi i KALLXO.com e konsideron si inkurajues faktin që shumica e rekomandimeve nga monitorimi i Testit të Maturës të vitit të kaluar janë marrë parasysh dhe zbatuar nga MAShT-i.
Si rekomandime kryesore për MAShT-in mbesin:
Testi të vazhdojë të zhvillohet në klasa me nga 15 nxënës; Testi të zhvillohet me dyer të hapura; të shpërndahen me shkrim, me kohë dhe në formë të qartë protokollet dhe përgjegjësitë e zyrtarëve të përfshirë në administrim të testimit, në mënyrë që të jenë të njoftuar dhe të përgatitur në detaje për të gjitha situatat e mundshme që mund të paraqiten gjatë procesit të testimit, për të siguruar një reagim uniform në tërë Kosovën gjatë mbarëvajtjes së testimit; MAShT-i të publikojë një listë udhëzimi ku i sqarohet çdo nxënësi në mënyrë të qartë së çfarë do të duhej të mbajë me vete një nxënës gjatë kohës së testimit (p.sh. laps, kalkulator, shishe uji, etj.), dhe të sqarohet se çka e ka të ndaluar të posedojë me vete (p.sh. telefon, materiale të ndryshme, libër, etj.); Të zbatohet në mënyrë të uniformuar rregullorja e MAShT-it për administrim të Testit të Maturës dhe të mos lejohen interpretime të ndryshme të rregullave të njëjta; Të shqyrtohen mundësitë për aplikim të testimit digjital për Testin e Maturës; Të ngritet niveli i bashkëpunimit me Policinë dhe Prokurorinë e Kosovës për t’i ndjekur rastet e keqpërdorimeve gjatë testit të maturës. Për të gjitha të gjeturat në detaje nga monitorimi i Testit të Maturës 2015 mund t’i gjeni në këtë link.