Shkruan: Shani Berisha
Të flasësh apo të shkruash sot për hapësirat gjelbëruese, në kohën kur ne si shoqëri jemi duke kaluar nëpër një fazë të rëndë të zhvillimit të përgjithshëm, ndoshta mund të quhet luks, mirëpo duke qenë të vetëdijshëm se pavarësisht këtyre problemeve me të cilat po ballafaqohemi si shoqëri, ne mendojmë se edhe kjo çështje duhet të shqyrtohet. Në kuadër të hapësirave gjelbëruese në qytet hyjnë territoret e caktuara, të planifikuara për implementim nga organet përkatëse të qeverisë komunale, të cilat territore do të krijonin ambiente komode për pushim e rekreacion për qytetarët.
Pozita gjeografike dhe bukurit e qytetit të Prizrenit janë pasuri të dhuruar nga vet nëna natyrë. Historikisht, nga shumica e pamjeve të mbetura ndër vite e shekuj, tregojnë se qyteti ynë, krahas transformimeve në sferat tjera zhvillimore edhe në drejtim të hapësirave dhe oazave gjelbëruese ishte për tu lakmuar, por lind pyetja : -Sot ku gjendet qytetit ynë në këtë drejtim? Qyteti Prizrenit e ka të hartuar e të miratuar Planin Zhvillimor Komunal (PZHK), dhe në kuadër të këtij plani bazik multisektorial për zhvillimin e komunës sonë, janë hartuara e miratuar disa Plane Rregulluese të Hollësishme (PRH. Në kuadër të tyre, përveç koeficienteve dhe parametrave tjera hapësinore, janë të definuara edhe hapësirat gjelbërues, të cilat siç e cekëm më lartë janë të nevojshme për rekreacion dhe reproduktimin e oksigjenit, por për fat të keq në qytetin e Prizrenit e vërteta qëndron ndryshe.
Garnitura aktuale qeverisëse e lazdruar dhe e papërgjegjshme siç është treguar deri më tani në shumë aspekte, për shkak të ndërhyrjeve të shpeshta të faktorëve të interesave ekonomike, të ndihmuar edhe në Kuvendin Komunal nga shumë mini-parti të qytetit (të mashtruara nga kjo garniturë me premtime boshe), kanë votuar dhe miratuar vendime që janë në kundërshtim me parametrat e paraparë sipas PZHK. ( Vlen për t’u përmendur vazhdimi i ndërtimeve kolektive në ish shiritin e gjelbër në mes rr. ’’Ekram Rexha‘’ dhe binareve të trenit, ku kemi shkelje ekstreme të koeficienteve dhe të vijave të ndërtimit).
Inicimi opozitës dhe shoqërisë civile si KDI dhe EC MA NDRYSHE, për shndërrimin e disa hapësirave komunale në hapësira gjelbëruese rekreative për qytetarë dhe atë pjesën e ish Ben-af dhe në pjesën e prapme të hapësirës së Shtëpisë së Bardhë, siç duket ka rënë në vesh të shurdhër të kryetarit Muja dhe stafit të tij dembel e të papërgjegjshëm. Kjo tregon se ky kryetar dhe ky staf qeverisës në komunën e Prizrenit dëshmon çdo ditë se ka rënë në ‘’gjumin e ariut’’ të krijuar nga shpenzimi i energjisë së tepërt si,pasojë e jo profesionalizmit dhe paditurisë.