Ndërkohë që vazhdon kriza politike në vend, organizatat e ndryshme joqeveritare kanë filluar që të bëjnë hulumtime te opinionet, në lidhje me atë se kush do të fitonte nëse do të mbaheshin zgjedhjet. Një organizatë joqeveritare me shumë ndikim në opinion kosovar, e ka realizuar një hulumtim të opinionit, i cili pritet që zyrtarisht të publikohet nga vetë kjo organizatë javën e ardhshme.
Gazeta Blic ka arritur që ta siguroj një pjesë të këtij hulumtimi, sidomos tek pjesa se nëse do të mbaheshin zgjedhjet sot, kënd do ta votonin qytetarët.
Sipas këtij hulumtimi, një pjesë të cilës e ka siguruar Gazeta Blic, PDK sërish do të dalë partia e parë me 29.6 për qind të votave, me një rënie të lehtë krahasuar me zgjedhjet e 2014-ës.
Si parti e dytë do të dalë partia e drejtuar nga Isa Mustafa, LDK me 25.3 për qind.
Hulumtimi i opinionit, i cili nga kjo organizatë u realizua në muajin nëntor, si parti të tretë e radhitë Lëvizjen Vetëvendosje me 17.1 për qind, derisa Aleanca për Ardhmërinë e Kosovës do të marrë 8.8 për qind. Partia e drejtuar nga Visar Ymeri, sipas këtij sondazhi rezulton me rritje prej rreth 4 për qind.
Sipas këtij sondazhi, një pjesë të të cilit e ka siguruar Gazeta Blic, partia e drejtuar nga Behgjet Pacolli, e cila në zgjedhjet e fundit nuk arriti ta kaloj pragun, nëse tash do të kishim zgjedhje, ajo do ta kaloj pragun, dhe do të marrë 5.9 për qind. Edhe partia e drejtuar nga Fatmir Limaj, Nisma për Kosovën do të kaloj pragun, duke marrë 5.8 për qind.
Ndërkaq, Lista Serbe do të marrë 3.1 për qind të votave, e pasuar nga Partia e Drejtësisë, me 1.3.
Derisa partitë tjera, së bashku kanë marrë 3. 2 për qind.
Edhe para pak ditësh u publikua një sondazh nga ana e një organizate tjetër, Indeks Kosova, e cila gjithashtu e nxori PDK-në si parti të parë, mirëpo si parti të dytë e nxori Vetëvendosjen, derisa LDK-në e nxori si parti të tretë.
Sipas sondazhit të publikuar nga Indeks Kosova, AKR e Nisma nuk do ta kalonin pragun, mirëpo hulumtimi i kësaj organizate kredibile jo qeveritare që pritet të publikohet javën tjetër, i futë edhe këto dy parti në Kuvend.
Në zgjedhjet e përgjithshme të mbajtura më 2014, PDK në koalicion me PD-në, LB-në, PSHDK-në dhe me PKK-në arriti që të marrë 30.38 për qind të votave, LDK arriti që të marrë 25.24, e pasuar nga Lëvizja Vetëvendosje e cila mori 13.59 për qind, AAK me 9.54, Lista Serbe 5.22, Nisma për Kosovën 5.15 dhe AKR 4.67./Gazeta Blic/