Rok grupi U2 i dedikon këngën e re qytetit të Parisit, pas sulmeve të fundit terroriste që lanë atje 130 persona të vdekur, raporton BBC.
Para koncertit në Francë, këngëtari Bono zbuloi se kënga e tyre e re, e titulluar “Streets of Surrender”, i dedikohet kryeqytetit francez dhe flet për Parisin si për një qytet të lirisë që i ka rrugët plotë me krenari dhe dashuri.
Grupi kishte planifikuar të performonte në Paris vetëm disa ditë pas sulmeve por koncertet u anuluan dhe pas pauzës ata mbajtën koncertin e parë mbrëmjen e së dielës, më 6 dhjetor.
“Ne qëndrojmë së bashku me familjet e të vrarëve në Paris”, tha Bono, ndërkohë që emrat e viktimave paraqiteshin në një ekran të madh në AccorHotels Arena.
Koncerti e radhës në këtë qytet U2 do ta mbajë sonte, më 7 dhjetor.