Zëvendëskryeministri Hashim Thaçi ka deklaruar se gjatë takimit në Zyrën e Presidentes, për Ramush Haradinajn nuk ishte shqetësim demarkacioni me Malin e Zi.
Madje, Thaçi tha se për këto procese ka ftuar Aleancën për Ardhmërinë e Kosovës që të japë kontributin e saj në komisionet që do të formohen për këtë çështje.
Për Haradinajn, sipas Thaçit, qëllim është vetëm rrëzimi i Qeverisë e jo diskutimet normale në Kuvendin e Kosovës.
“Ne kemi propozuar që AAK të marrë pjesë në seanca të përbashkëta dhe në komisionin ndërkombëtar për demarkacionin. Por, ka pasur një heshtje nga ana e liderit të AAK’së lidhur me këtë propozim dhe nuk e di se si do të reflektojë ai më tutje”.
Thaçi ka deklaruar se nuk kanë biseduar për çështjen e zgjedhjes së Presidentit, pasi ajo është e rregulluar sipas Kushtetutës.
“Nuk kemi biseduar rreth çështjes së zgjedhjes se Presidentit, e as për mbajtjen e zgjedhjeve, pasi këto janë të rregulluara me Kushtetutë”.
Ai, po ashtu, është shprehur se Kuvendi është vendi ku duhet të flitet për të gjitha mosmarrëveshjet e mospajtimet.