Një videoskandal është publikuar sot në mbrëmje në emisionin “Të Paekspozuarit” në televizionin “Ora News”, me protagonist kryetarin e bashkisë së Dibrës, Shukri Xhelili.
Pak muaj më parë, një vajzë 20-vjeçare bëri në këtë televizion një denoncim për një kryetar bashkie në një qytet të Shqipërisë.
Pretendimi i saj ishte se kryebashkiaku i kishte premtuar se do t’i gjente një punë në administratën e bashkisë nëse vajza pranonte të kryente marrëdhënie seksuale me të.
Denoncuesja nëpërmjet telefonit kishte lënë takim në zyrën e kryetarit për t’i kërkuar një vend pune, teksa ai, sipas saj, i kishte kërkuar favore seksuale.
Nesër qeveria pritet të firmosë shkarkimin e Xhelilit me një vendim qarkullues të Këshillit të Ministrave.
Menjëherë pas publikimit të skandalit reagoi deputeti socialist Erion Braçe. Përmes një statusi në “Facebook” ai e cilëson rastin si “neveritës” dhe kërkon largimin sa më parë të Xhelilit nga detyra. “Neveritës!! Të shporret një sahat e më parë!! As me duhet cili pleh e ka organizuar dhe kryer, fare fare; edhe pse dhe kjo duhet të hetohet!! Por, tani; të shporret!!”, shkruan Braçe.
Nuk ka vonuar edhe reagimi i PD-së me anë të një komunikate për media: “Partia Demokratike shpreh neverinë për abuzimin ordiner të zyrtarëve të pushtetit të Edi Ramës. Pamjet filmike të transmetuara sot në ‘Ora News’, ku kryetari i Bashkisë së Peshkopisë, Shukri Xhelili, kërkon favore seksuale në këmbim të një vendi pune janë një dëshmi më shumë se ku është zhytur shteti i Edi Ramës. Shtet i trafikantëve të drogës dhe prostitucionit, falsifikatorëve, gjobëvënësve, kriminelëve e tashmë dhe funksionare publikë që shfrytëzojnë mjerimin e grave dhe vajzave ku i ka zhytur kjo qeveri për t’u kërkuar favore seksuale në këmbim të një vendi pune”. /Shekulli/