Trashëgimia Kulturore e Prizrenit është shkatërruar ndër vite, derisa hov ka marrë dekadën e fundit. Historianët, derisa flasin për Zonën Historike të këtij qyteti, vlerësojnë se ndërtimet e egra – disa me leje, e disa pa leje, e që i kanë tejkaluar përmasat e lejuara – kanë sjellë këtë gjendje të mjerueshme.
Historiani Parim Kosova vlerëson se fajin për këtë e bartin institucionet përgjegjëse, në këtë rast komuna, e cila ka lëshuar leje për ta degraduar këtë zonë, por edhe vetëdijesimi i ulët i vetë qytetarëve, transmeton KTV.
Këtë prishje të pamjes së zonës historike po mundohet ta përmirësojë Këshilli për Mbrojtën e Monumenteve që është formuar një javë më parë.
Njëri prej anëtarëve të këtij komisioni, Don Shan Zefi thekson se dikush është munduar ta dëmtojë trashëgiminë kulturore, por, sipas tij, Prizreni do të ndryshojë për të mirë. E, për komunën e Prizrenit, kjo zonë nuk është e degraduar siç pretendojnë të tjerët.