Kryeprokurori i Zyrës së Prokurorit të Specializuar, David Schwendiman, në një konferencë për media, të enjten, në Hagë, ka thënë se ndjekja penale për krimet e pretenduara të UÇK’së në Kosovë do të bazohet në fakte, pa marrë parasysh pasojat politike dhe diplomatike. Ai ka thënë se ende ka shumë punë për ngritjen e aktakuzave, ndërkohë që ka theksuar se kjo do të ndodhë “kur ne të jemi gati – asnjë minutë më herët, asnjë minutë më vonë”.
Administrata e Gjykatës Speciale dhe Kryeprokuror i Zyrës së Prokurorit të Specializuar të Kosovës në konferencën për media kanë shpjeguar për themelimin e këtij institucioni dhe punën që pritet të ndodhë në të ardhmen.
Administratorja e Dhomave të Specializuara, Fidelma Donlon ka thënë se procesi i përzgjedhjes së Kryetarit të Dhomave të Specializuara dhe gjykatësve në Listën e Gjykatësve Ndërkombëtarë sapo ka filluar dhe kryhet nga një komision përzgjedhës i pavarur, ndërkohë që ka bërë me dije se veprimtaria gjyqësore do të fillojë pas ratifikimit të marrëveshjes nga Holanda. /Express