“Të drejtat e njeriut në Prizren mund të maten me shtetet e rajonit, bile ndoshta si shembulli më mirë i një tolerance fetare,ndërnjerëzore, ndërfetare. Prizreni është shembull se ka liri të lëvizjes më të lirë se në çdo qytet tjetër”, është shprehur Bashkim Gashi, nga KMDLNJ-ja në Prizren
E drejta e njeriut nuk nënkupton vetëm të drejtat për minoritete, por për të gjithë. Barazia e përgjithshme njerëzore dhe liria e mirëkuptimit së pari ndërnjerëzor pastaj ndërfetar dhe po kështu në nivele të tjera, është themelore, shprehet Bashkim Gashi,nga KMDLNJ-ja në Prizren. Ai bën të ditur se të drejtat e njeriut në Prizren mund të maten me shtetet e rajonit, bile ndoshta si shembulli më mirë i një tolerance fetare, ndërnjerëzore, ndërfetare. “Prizreni është shembull se ka liri të lëvizjes më të lirë se në çdo qytet tjetër”.
Tradita e mirëkuptimit
Ai është shprehur se ka një traditë mirëkuptimi në këtë qytet sa i përket barazisë ndërnjerëzore. Ai shton se Prizreni duhet të merret shembull për të tjerët. “Këto të drejta natyrisht se zbatohen në jetën e përditshme, por edhe në fushën shëndetësore. Si rast duhet të veçohet, ai i një të sëmuri që ka përkujdesje në maksimum dhe që është i pakicës serbe. Tani, më shumë se tri javë janë bërë që një pacienti të komunitetit serb i ka kaluar koha e hospitalizimit dhe ai tani e plot tri javë, për shkak të mosmundësisë së lëvizjes dhe mospasjes së strehës mbi kokë, ka mbetur banor i Repartit të Neurokirurgjisë në Spitalin Rajonal të Prizrenit. Lidhur me këtë rast, shefi i repartit, Dr.Mejdi Shehu shprehet se, edhe pse i kanë lajmëruar në organet kompetente, ai ende është në këtë repart dhe përkujdesja nuk ka munguar, porse atij i duhet një trajtim shtëpiak.
“Ne i kemi kushtuar kujdes të shtuar. Por, gjithashtu edhe i kemi kërkuar të gjitha të drejtat njerëzore e shëndetësore për pacientin”, tregon Dr. Shehu për “Kosova Sot”.
Lidhur me këtë, zëdhënësi i Komunës së Prizrenit, Ymer Berisha, tha se pas konsultës që ka pasur me Zyrën për komunitete, ka arritur të mësojë se kjo zyrë ka bërë angazhim maksimal lidhur me rastin konkret, dhe së shpejti do t’i bëhet zgjidhje këtij rasti qoftë nga organet e tjera, por edhe ato komunale.
Të drejtat e njeriut gjithmonë duhet përmirësuar
Bashkim Gashi është shprehur se në bashkëpunim me Komunën e Prizrenit është miratuar edhe një strategji për të drejta të njeriut, për të pasur mundësi të barabarta dhe mos-diskriminim edhe ndaj komuniteteve rom, ashkali dhe egjiptian.
“Kjo strategji përqendrohet në katër fusha kryesore, arsim, punësim dhe mirëqenie sociale,shëndetësi dhe banim, ku zbatimi i saj do të ndihmojë në përmirësimin e gjendjes sociale-ekonomike të këtyre komuniteteve të cenueshme”. Ai tregon se të drejtat e njeriut gjithmonë kanë vend për përmasimin.
“Ajo që dua të them është fakti se niveli i këtyre të drejtave është në nivel me shtete të tjera të rajonit e ka edhe ndonjë privilegj edhe më shumë ndoshta”. Gashi shprehet se e drejta e njeriut shënon edhe përmirësime të tjera. “Vitet e fundit, derisa në qytete të tjera apo në vetë shtetet e rajonit ka rritje të ndarjes e të vrasjeve, në Prizren ndarjet e çifteve kanë shënuar rënie. Ajo që duhet të veçohet tanimë është se gati në tërësi është zhdukur gjakmarrja në këtë komunë. Kurse vetë mirëkuptimi së pari brenda shumicës dhe pastaj ndaj pakicave po shënon rezultate të mira”, është shprehur ai.
(Kosova Sot)