Kryetar i ZES-it, përkatësisht Federatës së Shoqatave të Afaristëve dhe Bizneseve në Prizren, Rafet Bushati ka konfirmuar se shqetësimi në lidhje me sigurinë , përkatësisht mbylljen e hershme të dyqaneve është adresuar nga disa zejtarë, përkatësisht argjendarë.
“Ata kanë shprehur qëndrimin se nuk ka patrullime të policisë apo, ato janë shumë të rralla, si dhe problemin e ndriçimit”, tha Bushati për KD.
Ndërkaq, deputeti i Kuvendit të Kosovës, Zafir Berisha, që njëherësh udhëheq edhe Degën e Nismës në Prizren, dje ka akuzuar autoritetet komunale se e kanë bërë të rëndë jetesën e qytetarëve dhe të bizneseve, veçanërisht sa i përket aspektit të sigurisë.
Pasiguria manifestohet me frikën e argjendarëve për të punuar, ngase ata i hapin dyqanet më vonë se bizneset e tjera dhe i mbyllin po ashtu më herët, nga frika e ndonjë sulmi eventual nga hajdutët.
“Bizneset ndihen të pasigurta. Situata e rëndë në rrafshin e sigurisë ka bërë që shumë biznese, veçanërisht argjendarët në rrugën ‘Adem Jashari’ t’i hapin dyqanet e tyre pasi të popullohet rruga me qytetarë, si edhe t’i mbyllin para se të bjerë terri”, ka thënë Berisha.
Ai ka shtuar se Këshilli Komunal i Sigurisë në Bashkësi udhëhiqet nga kryetari i Komunës, “i cili në mungesë të dijes dhe vizionit ka bërë që qytetarët sot të jenë të pasigurt edhe në shtëpitë e tyre”.
“Në Prizren hajdutë të maskuar vjedhin çdo ditë… Edhe pas 17 vjetëve liri dhe 9 vjetëve pavarësi, të jemi të pasigurt për të jetuar dhe për të zhvilluar veprimtari ekonomike dhe biznesore, është më se skandaloze dhe e patolerueshme”, ka deklaruar Berisha.