Drejtori i Drejtorisë Komunale të Arsimit në Suharekë, Sherif Berisha, i akuzuar në një rast tjetër për punësimin pa konkurs të afër 10 mësimdhënësve, tani akuzohet se nuk ka respektuar një vendim të Inspektoratit të Arsimit, për anulimin e një konkursi dhe ri-shpalljen e tij. Të hënën, Berisha është paraqitur në Gjykatën Themelore në Prizren, për t’u deklaruar rreth kësaj akuze.
Gjatë shqyrtimit fillestar, pas leximit të aktakuzës nga ana e prokurores së rastit, Ervehe Gashi, i akuzuari Berisha ka deklaruar se nuk e pranon fajësinë për veprën penale me të cilën ngarkohet..
Mbrojtësi i të akuzuarit, avokati Brahim Sopa, ka paralajmëruar se do të parashtrojë kërkesë për hedhjen e aktakuzës dhe kundërshtimin e provave.
Kryetari i trupit gjykues, Xheladin Osmani, shqyrtimin e dytë për këtë rast e ka caktuar për 1 mars 2017, me fillim në ora 09:30.
Në dhjetor të vitit të kaluar, Prokuroria Themelore në Prizren, ka ngritur aktakuzë ndaj Sherif Berishës, të cilin e akuzon për keqpërdorim të detyrës apo autoritetit zyrtar.
Sipas aktakuzës, Berisha në cilësinë e drejtorit të Drejtorisë Komunale të Arsimit në Suharekë, nuk ka respektuar një rekomandim të Sektorit të Inspeksionit të Arsimit (SIA) në Prizren, për anulimin e konkursit për mësimdhënës.
SIA kishte rekomanduar që konkursi për rekrutimin e mësimdhënësve për shkollën e mesme profesionale “Abdyl Rama” në Suharekë, të anulohet dhe të ri-shpallet në afat prej 8 ditësh.
Sipas organit të akuzës, me këto veprime i akuzuari ka kryer veprën penale të keqpërdorimit të detyrës zyrtare dhe ka shkelur rëndë të drejtat e personave tjerë, konkurrues në konkursin në fjalë./betimiperdrejtesi/